Ôi 6/2, n’gor Dak Lak lĕ ƀư mâp măt bôk năm đah rmôt gĭt blău, văn nghệ sĩ n’hanh báo chí dôl pah kan ta ntŭk; djôt dơn ăp nău rgop khlay bah ăp nuĭh gĭt blău tâm nău hun hao bah n’gor. Tĭng kruanh UBND n’gor Dak Lak, năm 2024, wăng sa n’gor Dak Lak bôl hôm e âk jêr jŏt n’hanh mô geh trong nchrăp n’gluh an. Yơn lah, đah nău nsrôih bah lĕ trong chính trị, n’gor lĕ dơi geh ăp săk rnglăy uĕh. GRDP rĭng bôk nuĭh bah n’gor geh 72,8 rkeh prăk, dĭng lĕ sŏk an tơm prăk geh 8.500 rmen prăk; dĭng lĕ geh prăk tăch n’gluh geh 1 rmen 650 rkeh đôlar; khlay dĭng lĕ ndơ ta lam n’gor tĭng rnoh aƀaơ geh rlău 141 rbăn rmen prăk, dâk bôk năp nkual Tây Nguyên.

Tâm nău geh nĕ, rmôt gĭt blău, văn nghệ sĩ n’hanh báo chí lĕ rgop khlay rnôk mô rlu mĭn rlă-nkoch trêng, ngăch mbơh mpeh ăp ntil nău rêh, wăng sa rêh jêng kon nuĭh, ntrŭt nsôr nuih n’hâm mĭn rlă, rgâl mhe n’hanh hun hao, mât njrăng ăp nău khlay uĕh lăng n’hanh ntĭm mô đêt nău ƀư mô uĕh, mô hŏ dơi. N’gor Dak Lak dôl rƀŏng tât du năm 2025 đah âk nău geh mhe tâm hun hao wăng sa mrô, nău uĕh blău, khoa học công nghệ. Ăp ntil nău aơ mô dơi mô geh nău hăn ndrel n’hanh rgop bah rmôt gĭt blău, văn nghệ sĩ, báo chí. Ndơn măt kruanh n’gor Dak Lak, wa Nguyễn Tuấn Hà, Groi Kruanh rnâng kan UBND n’gor Dak Lak lĕ njuăl nău mbah rhơn tât lĕ rngôch rmôt gĭt blău, văn nghệ sĩ n’hanh báo chí, mpŏng năm 2025 mbra lah du năm lôch uĕh, đah âk nău rgop khlay an nău hun hao bah n’gor Dak Lak n’hanh neh dak.