N’ha nse bâh tơm tư̆ sa geh ƀăl, rnôk sa n’ha nkrŏch n’hanh ntêng ntêng. N’ha tơm tư̆ way geh tôch ta khay wai, rnôk tơm geh âk mblom nse. Nuĭh Rđe way geh dŏng n’ha nse bâh tơm tư̆ gay ma sa rêh, sa nkre đah ăp ntil biăp bri êng, mô lah lĭp đah mắm nêm, mắm ruốc. N’ha nse bâh n’ha tư̆ lĕ geh dŏng gay ma ƀư mpli bla, kơt lah bla ka, yuh đah ka kro n’hanh ka n’hôl. Yuh H’Lop Niê ta Buôn Sah B, xã Ea Tul, nkuăl Cư M’gar, n’gor Đăk Lăk an gĭt, n’ha tơm tư̆ nse sa ƀăl, hăng djanh bâh mbrăch, nkre nău ƀô kah bâh bri yôk Tây Nguyên lah nău khlăy njêng nău ueh êng an ndơ sa đah n’ha tư̆ nse juh đah ka n’hôl. “Ndơ sa aơ kah ngăn, dŭt tâm di đah sa piăng duh. Aơ lah ndơ sa ka n’hôl đah n’ha tơm tư̆ nse. Ka rĭ jăng lơi nting lok n’hanh i bôk, n’ha tơm tư̆ rĭ tôch ta dăch dak me, ta mir, lôch nĕ juh đah mbrăch, boh bôt ngot n’hanh jăm tăp. Ndơ sa aơ geh tâm rơh sa ăp nar bâh nuĭh Rđe bâh ntơm hôm”.

Rnôk măt nar mhe hao, nuĭh Rđe lĕ nchrăp ăp ndtil ndơ hăn ta mir. Ta meng ăp sah anh jâk ndơ, mô dơi mô geh ndơ sa dơh, ngăch, yơn hôm nha geh tŏng ăp ndơ kah an du nar jong. N’hanh n’ha tơm tư̆ juh đah ka n’hôl lah ngoăy tâm âk ndơ sa kơt nĕ. Ndơ sa n’ha tư̆ juh đah ka n’hôl way geh sa đah piăng duh n’hanh biăp rêh, jêng geh du ndơ sa dŭt ueh dơh yơn dŭt kah. yuh H Đô Niê ta Buôn Sah B, xã Ea Tul, nkuăl Cư M’gar, n’gor Đăk Lăk nkoch, nău nkret ndơ sa aơ mô geh jêr, yơn an dơi geh nău kah ngăn rĭ an geh nău blău, nău ƀư na nê̆ bâh nuĭh gâm.“N’ha tơm tư̆ nse ta khay aơ lah kah ngăn, lah trôk mih rĭ mô hôm kah tay, n’ha tơm tư̆ mbra kranh, mô hôm geh nău rƀă, nse tay. ndơ sa aơ geh ƀư bâh bri, n’ha tơm tư̆ mbra dơi tăm văr jay mô lah ta mir, ơm geh ta bri. hôm ka rĭ mbra dơi nhup ta dak me, lôch nĕ n’hôl sĭn mô lah rvăt ka n’hôl ta ntŭk tăch ndơ”.

Ka n’hôl juh ma n’ha tơm tư̆ lah du ndơ sa kah geh nău ueh êng tâm nău way ndơ sa ueh êng bâh nuĭh Rđe, mpơl nău mĭn kan mhe tâm nău nkret ƀư ndơ sa. ndơ sa aơ way geh dŏng tâm ăp rơh ngêt sông rnăk vâl, mô lah ta ăp rơh tâm mâp tâm nđur bâh ƀon lan. Ngăn lah, ta khay 3, rnôk ma trôk neh Tây Nguyên dôl lăp yan năm mhe, ndơ sa aơ mô dơn lah ndơ sa geh mpơl nău ueh êng bâh yôk bri ma hôm nha lah nău tâm rgop nsum ntŭk rêh jêng n’hanh nău lah ueh bâh bri yôk nsĭt tay.

H Zawut