Ju lah ntil tơm tăm dŭt bên đah he n’hanh tĭng nău nkret njêng bah ăp nkual tơm ju dơi nkret gâm jêng ăp ndơ sa kah. Trau poăch djăr choh juh geh bah kăl e tâm ntŭk gŭ rêh Êđê. Aơ lah du ndơ sa geh bah nău rêh hăn ndrel đah bri dak. Tĭng nău blău ơm u che trêng ntĭm tay, bah tơm ju, bum, play mô lah nkao ju, nuĭh Êđê nkret gâm âk ntil ndơ sa kah, uĕh. Nuĭh Êđê geh âk ndơ sa bah dô ju nkret gâm choh bla n’hanh way gâm nsum đah blân tăng. Ndơ sa way mô jêr n’hanh dŭt dơh gâm. Lơn lah geh ndơ ju bri choh đah poăch djăr way dơi nkret gâm jêr lơn, joi nuĭh gâm blău tâm nău pot bôh mrăch, n’hanh lơn lah m’hâm ƀư gay tơm ju hôm e dơi uĕh n’hanh ƀô kah. Gay geh du ndơ ju choh kah, nuĭh Êđê way sreh tơm ju bri êp tu dak, tơm ju jêh sreh mbra dơi plôk lĕ ntô bah dih.

Yuh H’Lyna Niê, Buôn Sah B, xă Ea Tul, nkuăl Cư M’gar, n’gor Dak Lak an gĭt, bah kăl e nuĭh Êđê an lah tơm ju geh âk dak n’hanh kah uĕh an săk, lĕ geh dŭt âk ndơ sa bah tơm ju kơt gâm trau pai, gâm đah blân tăng, sa rêh... Hôm trau poăch djăr choh ju bri dơi uănh lah du ndơ kah bah ƀon lan.

“Trau gôl ju choh an geh tŏng bôh mrăch mư kah. Poăch djăr gŭch sĭn, hôm năr djăr khêk sŏk poăch n’hanh choh hăch. Jêh nĕ păt lĕ dak tâm gôl ju. Jêh nĕ tay lah juh mrăch, cheh ăp ndơ kơt bôh, bột ngọt, jăm play, gir. Ndơ aơ dŭt kah”.

Ndơ sa aơ way sa đah piăng duh, mô lah sa dơm. Njŭng bah gôl ju ntop đah du đêt hăng bah mrăch jrai. Trau poăch djăr choh gôl ju bah nuĭh Êđê êng đah ndơ djăr tơm ju bah du đêt nkual geh tay kah duh bah gir, jăm play n’hanh rnih bah tuh neh nsĭt tay nău nkah gĭt an nuĭh sa. Bôl nău rêh geh âk nău rgâl, nău ntoh bah âk ntil ndơ mhe ƀư âk ntil ndơ sa bah ntŭk gŭ rêh Êđê. Yơn, ndơ sa poăch djăr choh bri hôm e hăn ndrel, jêng ndơ sa ŭch ngăn tâm nkret gâm ndơ sa bah âk rnăk wâl Êđê.

Yuh H’Lyna Niê, ƀon Sah B, xă Ea Tul, nkuăl Cư M’gar, n’gor Dak Lak an gĭt tay, aƀaơ âk rnăk hôm e tăm tơm ju bri tâm mir gay dơh nkret gâm ăp ndơ sa an rnăk wâl. Aơ lah ndơ sa geh mro tâm ăp nar răm bah rnăk wâl n’hanh ƀon lan yor ndơ geh ơm, dơh nkret gâm n’hanh kah.

“Ndơ sa aơ mô dơi mô geh tâm ƀon lan. Ăp rnôk jay geh nău răm rngot mô lah geh năch, oh nô tât jay chop khâl, nuĭh Êđê way gŭch djăr gay wơt năch, nău tâm rŏng đah oh nô. Rnôk nĕ, jâng djăr mô lah năr djăr ƀư ăp ndơ sa êng êng, mô jăng dơm. Rnôk nkret gâm sŏk lĕ nting jêng nuĭh ranh kon se dơi sa da dê”.

Trau poăch djar ju bri choh bah nuĭh Êđê dơh nkra, dơh n’hanh kah kơt ăp nuĭh kon bah ƀon lan ƀư nuĭh lĕ du tơ̆ sa mbra nkah gĭt mro mô dơi chuêl.