Por srat- kơt nău ntơ bâh păng nơm, geh nau srat oi, ƀô kah bâh ndrui n’gon ndrănh yăng. Êng đah ăp ntil ndơ sa way ơm kơt m’êt prung, djăr gŭch...way geh dŏng rnôk geh nău kuăl brah tâm ƀon, por srat lah du ntil ndơ sa dŭt bên bâh ăp rnăk vâl bâh nuĭh K’Ho. Khân păng rŭk por srat gay ma sa ăp nar, gay ma njôt hăn ta mir ndơn đah dak ngêt. Tĭng wa K’Bri ta ƀon Kon Tăch Đăng, nkuăl têh Đinh Văn, nkuăl Lâm Hà, n’gor Lâm Đồng, ndơ gay ma rŭk por srat rĭ dơh dơm, nĕ lah đah ăp ntil phe. Wa K’Bri an gĭt:

“Rŭk por srat rĭ ăp ntil phe dơi da dê, mbra rŭk ma phe mir kơh, phe ngăn mô lah mbo. Lah dŏng phe ngăn he săch ntil piăng sơh, dăng. Yơn kah ngăn lah phe mir”.

Gay ma dơi rŭk por srat rĭ bu way nkret rŭk jêng por. Bôk năp lah rpa phe, mô dơi rpo kloh ir yor lah rpa kloh ir por mbra mô hôm chĭnh. Lôch nĕ gâm nkret ta nă ŭnh. Gay ma dơi geh por srat rĭ glah por rŭk an tâm di dơi sa, mô dơi lêk ir yor rnôk jêng ndrui an jêng por srat păng mbra dak ir.

Por lôch nkret mô kâp tĕ boh bột ngot, kanŭng an nđik ngăn lôch nĕ troch ta nông kro, ntrŭp an nâp. Yông ta mpir nă ŭnh 1,2 nar lah lĕ geh por srat sa hôm. Wa K’Bri nkoch mpeh nău rŭk por srat.

“He ruk por mô an lêk ir, an păng dang dơm mbra kah ngăn. Lah lêk ir mô hôm kah. Nău way rĭ 1,2 nar lah por mbra srat. Gay ma dơi geh por srat rĭ lôch rŭk por he an nđik lôch nĕ troch ta nông kro yông ta mpir jay”.

Nkoch đah ndơ sa ndrel, wa K’Bri an gĭt, por srat mbra dơi sa ndrel đah lĕ rngôch ăp ntil ndơ sa. Tĭng ta nău sa ntŭk sa n’hanh nău ŭch sa bâh êng nuĭh ma bu sa ndrel đah ăp ntil ndơ êng êng. Wa an git.

“He mbra dơi sa đah ăp ntil biăp, poăch..yơn kah ngăn n’hanh tâm di ngăn lah sa đah ka kro, ka hâp gŭch lôch nĕ yuh ndrel đah mbrăch”.

Nuĭh K’Ho mĭn lah por srat lah du ntil ndơ sa kah, mô dơi mô geh. Ntil por aơ geh âk nău ueh, mbra dơi dŏng dak ngêt ta rnôk hăn kan duh nar ta mir ba. Rlău ma nĕ, por hôm nha dơi bah duh săk, kơl an săk soan dăng, chol ăp nău sial lăp. Por srat lah ndơ sa way ơm bâh nuĭh K’Ho. Nĕ lah nău ueh êng bâh ndơ sa geh ndray bâh rơh aơ tât rơh êng. năch tât ta Lâm Đồng mbra geh sa por srat gay ma gĭt nău ueh êng bâh ndơ sa por srat aơ.