Ta n’gor Gia Lai mhe ƀư Rơh tâm rlong thể thao ăp rnoi mpôl đê̆ lam dak tâl XIII, nkual II năm 2023. Aơ lah rnôk gay tâm nđŭr, tâm kơt nti, hun hao trong leo thể dục thể thao, n’hao dăng tâm rnglăp đah ăp rnoi mpôl đê̆.

Ăp nar rlău aơ, nkual ƀon têh Pleiku, n’gor Gia Lai khuh n’gôr, rhơn mƀak đah nău rgum bah 500 nuĭh tâm rlong ngăch prăl ta Rơh tâm rlong thể thao ăp rnoi mpôl đê̆ lam dak tâl XIII, nkual II năm 2023. Âk ntŭk tâm rlong tâm nkual ƀon têh wăch rgum nău ŭanh khlay n’hanh ntroh n’gôr bah nuĭh ƀon lan ta ntŭk. Ăp nuĭh tâm rlong mpơl nuih n’hâm tâm rlong âk. Nuĭh râng tâm rlong Quách Ngọc Hoan, Mpôl thể thao n’gor Dak Lak, nsing nơm:

        “Rơh tâm rlong năm 2022, Mpôl Dak Lak dâk bôk năp lam mpôl pănh na. Mpôl Dak Lak tât đah hội thao ăp rnoi mpôl đê̆ năm aơ ri mpôl hên nsrôih lĕ n’hâm ngăn. Bol geh dŭt âk mpôl dăng blău mpeh tâm rlong pănh na kơt Bình Định, Gia Lai, Kon Tum, Quảng Ngãi, yơn lah tâm rnôk tiăr nti ri mpôl hên nsrôih dŭt lĕ n’hâm suan gay mât nău dơi uĕh kơt năm bah năp nơh”   

Ta rơh tâm rlong dja, Gia Lai, Dak Lak n’hanh Kon Tum lah ăp đơn vị râng tŏng 7 môn. Wa Nguyễn Văn Ý- Groi Giám đốc Sở Văn hóa-Thể thao n’hanh Pâl nđaih an gĭt: Hŏ 10 năm hôm Gia Lai mơ đăng cai rơh tâm rlong lam dak. Aơ lah nar kan têh, mô dơn lah tâm rlong ngăch prăl mpeh thể thao ma hôm lah ntŭk tâm nđŭr, wăch rgum ăp rnoi mpôl đê̆ oh nô. Mpôl tâm rlong Gia Lai geh kơi ntop nuĭh tâm rlong mom ndăm ngăch prăl. Lơn lah, môn pănh na geh âk nuĭh tâm rlong ngăch prăl. Ăp kon se dơi tiăr nti ma ăp rơh tâm rlong ta Đại hội Thể dục thể thao lam n’gor tâm năm 2022. Nuĭh tâm rlong Rơ Châm Dác - Mpôl Thể thao dak tơm jay Gia Lai nkoch:

        “Aơ lah tâl puăn gâp râng tâm rlong lam dak, tâm 3 tơ̆ tâm rlong bah năp nê nơh geh 6 huy chương vàng. Năm aơ gâp hŏ geh 1 huy chương vàng nkô̆ tâm rlong nchuăt 100m, gâp nsrôih geh tay huy chương nkô̆ tâm rlong 300 mét. Gâp ŭch an tay ăp huy chương dja an băl mpôl, n’hanh rnăk wâl, me bơ̆  n’hao êng săk”.

          Rơh tâm rlong thể thao ăp rnoi mpôl đê̆ lam dak tâl XIII, nkual II mô dơn lah du ntŭk pâl uĕh an ăp nuĭh tâm rlong, ma hôm lah rnôk gay ntô̆ n’hao văn hoá, way ơm n’hanh nuih n’hâm tâm rnglăp bah ăp rnoi mpôl đê̆  oh nô. Tâm rlong rgop tâm nău hun hao bah thể thao n’hanh pâl nđaih bah nkual II lah êng n’hanh lam dak lah nsum đŏng. Wa Nguyễn Liên Phương – Groi Giám đốc Sở Văn hoá, Thể thao n’hanh Pâl nđaih n’gor Quảng Ngãi, lah:

        “Khuh n’gôr nar rgum tâm rlong ri lĕ rngôch ăp mpôl tâm rlong wăch sĭt ta aơ da dê, lĕ rngôch 13 mpôl hăn tât ta aơ đah nuih n’hâm rhơn nđơr. Nău ŭch lah gay tâm nđŭr mpeh văn hóa n’hanh thể thao gay ăp kônh wa ƀon lan rnoi mpôl đê̆ tâm mâp n’hanh tâm nđŭr nar lơn ma tâm rnglăp lơn”.

Rơh tâm rlong năm aơ rgum bơi 500 nuĭh tâm rlong bah 13 n’gor geh ăp rnoi mpôl đê̆ gŭ rêh ta nkual mpeh bah dâng ntơm bah nkual ƀon têh Đà Nẵng lah: Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Đak Nông, Bà Rịa-Vũng Tàu, Bình Định, Dak Lak n’hanh Quảng Ngãi. Rđĭl đah rơh tâm rlong tâl XII dơi ƀư ta n’gor Quảng Ngãi tâm năm 2022, tâm rlong rơh dja hŏ geh tay mpôl bah Bà Rịa-Vũng Tàu. Ta rơh tâm rlong năm aơ, ăp nuĭh tâm rlong ta 7 môn lah: nchuăt jong, chưng play, pah play bu ur- bu klô, pănh na, ncho lơng djơng, ntrôl mâng n’hanh têk rse. Râng nar rgum, nuĭh tâm rlong Y Thơ Hwing tât bah mpôl tâm rlong n’gor Dak Lak, lah:

        “Nuih n’hâm bah he n’hanh ăp oh nô tâm rmôt tâm rlong Dak Lak dŭt rhơn nđơr yor nar rgum dja kơt lah du nar rgum tâm rnglăp ăp rnoi mpôl đê̆ jêng he n’hanh ăp oh nô tâm rmôt dŭt rhơn nđơr. Aơ lah rnôk dŭt uĕh gay lĕ rngôch ăp môn tâm rlong lah nsum geh rnôk tâm mâp đah ăp oh nô rnoi nuĭh êng ƀa ƀă. Rlău ăp rơh tâm rlong kơt aơ ntrŭt nsôr nuih n’hâm gân djăng tâm thể thao n’hanh tiăr nti thể thao tĭng trong Wa Hồ ntô̆ n’hao tâm ƀon lan ăp rnoi nuĭh oh nô đŏng. Ntơm bah aơ lah rnôk gay ăp nuĭh tâm rlong n’hao nău gĭt blău n’hanh geh nău dơi ngăch prăl âk an n’gor bah he nơm”.

Rơh tâm rlong Thể thao ăp rnoi mpôl đê̆ nkual II dơi ƀư 2 năm/tơ̆, lah nău kan gay tĭng ƀư trong nchrăp bah Đảng n’hanh Ngih dak mpeh hun hao wăng sa, văn hóa, rêh jêng kon nuĭh, thể dục thể thao an ƀon lan ăp rnoi mpôl đê̆; Hun hao jru hvi trong leo tiăr nti n’hanh tâm rlong thể dục thể thao n’hao ngăch dăng n’hâm suan, n’hao nău rêh văn hóa nuih n’hâm an ƀon lan; ntrôl dăng pah kan nkoch trêng, rgŏ jă ƀon lan ăp rnoi mpôl đê̆ nsrôih râng rơh rgŏ jă “Lam ƀon lan tiăr nti thể thao tĭng Wa Hồ têh kuâng”, đah nuih n’hâm “Dăng gay rdâk njêng n’hanh mât njrăng neh dak” nkre đah Trong leo ƀư “Lam ƀon lan tâm rnglăp rdâk njêng nău rêh văn hóa” tâm dâng./.