Siu H’An deh n’hanh têh ta ƀon Kênh Mét, xă Ia Le, nkuăl Chư Pưh, n’gor Gia Lai. Rnôk kon se Siu H’An wât ăp nău mprơ tâm ăp nar dơi me mă hăn tâm mir. Măng sĭt, Siu H’An lŏ gŭ wăr ŭnh năk jay nhih, lăp săk nơm tâm ăp ot ndrong n’hanh ăp nău nkoch yău bah u che nkoch tay.

Ntŭr neh nđơn yău lah trong dơi Siu H’An djôt bah ƀon lan tât Ngih sam ƀŭt Trung học cơ sở Dân tộc nội trú nkuăl Chư Sê, n’gor Gia Lai. Siu H’An nkah tay nău nkah ndray ngăn rnôk hôm e gŭ nội trú, măng tât, ăp băl gŭ djăt oh nkoch nđơn dŭt ŭch, chuêl nău nkah gĭt ƀon lan. Ăp nuĭh tâm nđơn Jarai kơt Dăm Giông, ndăm Drit, Bu ur Hơbia... kơt ntop tay soan dăng.

“Nđơn Khan Dăm Giông nkoch mpeh du nău tâm lơh tâm su kơl neh dak, kơl ƀon lan. Hôm Dăm Drit nkoch mpeh du hê bu klô ach o, geh ƀon lan dêr, nuĭh mâp mưch rmot, jêh nĕ bu klô ndăm Drit jêng du hê nuĭh ndrŏng, sâm gêh. Hôm nkoch khan Bu ur Hơbia lah nkoch mpeh du hê bu ur mô uĕh, jêh nĕ jêng du hê bu ur uĕh rom ngăn”.

Siu H’An ŭch nkoch nđơn mpeh ăp nuĭh tâm nđơn bah nuĭh Jarai. Tâm nĕ nuĭh “Nô Nan” tâm nđơn ndrel săk ntoh lư mpeh soan dăng, nuih n’hâm têh dăng bah ăp bu klô ndăm tây Nguyên. Nĕ lah nău nkoch geh nău ŭch bah nuĭh Tây Nguyên geh soan têh dăng gay dun n’gang mpa janh, mât njrăng ƀon lan đăp mpăn. He djăt Siu H’An nkoch du gâl nău aơ, ndrel đah nău nkoch bah ăp nuĭh tâm nđơn.

“Nđơn nkoch mpeh Nô Nan ri nuĭh aơ lah nuĭh phah tâm ƀon lan, way lơh nuĭh êng, mô lah dông kon jay bu jêng way geh mê̆ lah. Rnôk nuĭh bơ̆ hăn kơl 2 hê me kon luh yău janh, mê̆ saơ pơng janh, way lơh nuĭh jêng mê̆ mư lah “Nô Nan ơi, lah janh kon têh kơt nĕ kon nkhĭt yău aơ heh”. Aơ lah yău janh way lăp tâm ƀon sa poăch nuĭh. Nô Nan djăt mĕ lah kơt nĕ, ndrĭ lah Nô Nan lĕ tâm lơh đah yău janh, nsĭt tay đăp mpăn an ƀon lan”.

Bah meng ăp nău nđơn kơt du gâl bah nuih n’hâm, Siu H’An hôm geh er mprơ uĕh, geh âk nău rnot. Mô knŭng gĭt ăp nău mprơ Jarai ơm yor u n’hanh mê̆ trêng tay, Siu H’An hôm rlă mhe an nău mprơ Jarai tĭng nău ŭch êng nơm. Lơn lah, oh an du nău rŏng đah nuĭh deh mât rong.

“Gâp ŭch mprơ gay rnê rhơn n’hâm soan bah me bơ̆, lah uĕh me bơ̆ lĕ mât, rong an gâp bah jêt tât têh, an gâp jêng nuĭh. Gâp dŭt rŏng me bơ̆. Gâp mĭn tay ăp nar khay jêr jŏt bah me bơ̆ gâp hăn kuih bum bri, joi biăp tâm bri gay mât ăp oh kon. Lah gâp têh jêng kơt bu ri gâp mô an me bơ̆ gâp hăn ƀư mir njê kơt nĕ”.

N’hanh aƀaơ he djăt du gâl tâm nău nchih “Mê̆ bơ̆ ơi”, nău mprơ Jarai, yor Siu H’An rlă mhe.

Mê̆ ơi! kon kuăl mê̆. Bơ̆ ơi! Kon kuăl bơ̆. Kon nkah gĭt bơ̆ mê̆! Kăl e mê̆ tă hăn kuih bum, mê̆ tă hăn joi biapư tâm bri mât kon”.

Siu H’An dŭt rngot, n’hanh yuh lĕ nhim rnôk mprơ. Ta năm 40, yơn rnôk dâk ta sân khấu rhôp nău mprơ, yuh lĕ nhim kơt kon se kuăl bơ̆, kuăl mê̆. Yor rngot ngăn lĕ lăp tât play nuih tâm nău mprơ.