Ôi 2/6, Ủy ban nhân dân nkual ƀon têh Buôn Ma Thuột ƀư Tâm nchră n’glôch jêh ăp nău kan tĭng nar Lễ hội Cà phê Buôn Ma Thuột tâl 8 năm 2023. Lah đơn vị tơm jay, nkual ƀon têh Buôn Ma Thuột hŏ ƀư geh nău dơi 16/18 nău kan tơm bah Lễ hội cà phê Buôn Ma Thuột tâl 8 năm 2023. Ăp nău kan tĭng nar Lễ hội kơt: Nar rgum văn hóa, thể thao ăp rnoi mpôl đê̆ nkual  ƀon têh Buôn Ma Thuột; rdâk njêng bôk nău kan App Cà phê n’hanh Pâl nđaih; ƀư ndrơng ndơ rhŏ dŏng cà phê ngêt dơm ta trong Phan Đình Giót; rgŏ jă ăp quán cà phê lam nkual ƀon têh rhŏ dŏng dơm cà phê tâm rnôk ƀư Lễ  hội…dơi nkual ƀon têh Buôn Ma Thuột an ƀư geh nău dơi đŏng, an tay âk nău nkah uĕh lăng tâm nuih n’hâm năch n’hanh nuĭh ƀon lan ta ntŭk.

Ntŭk rgum khlay tâm ăp nău kan tĭng nar Lễ hội cà phê Buôn Ma Thuột tâl 8 bah nkual ƀon têh nê lah nkual ƀon têh hŏ rgŏ jă geh bơi 380 ntŭk, doanh nghiệp tăch rgâl cà phê ta 21 xã phường râng Nar an ngêt dơm cà phê, trong hăn jâng ngêt dơm cà phê đah rlău 250 rbăn ly cà phê dơi rhŏ dơm an năch. Nchroh rnoh khlay rlău 6 rmen prăk. Bah nău dơi bah nar ngêt dơm cà phê ta Lễ hội cà phê Buôn Ma Thuột tâl 8, tâm let năp tay, nkual ƀon têh mbra sơch nar 10/3 ăp năm lah nar ngêt dơm cà phê ta nkual ƀon têh Buôn Ma Thuột, hăn tât rdâk njêng Buôn Ma Thuột jêng nkual ƀon têh bah cà phê lam ntŭr neh./.