VOV4.M’nông: Tâm nđŭr njroh mprơ lam dak rơh tal 2, năm 2021 mhe ƀư ta Dak Lak. Ăp năm bah năp, ăp mpôl nghệ thuật chuyên nghiệp bah ăp n’gor nkual ƀon têh lam dak lĕ ƀư an nuĭh uănh ăp nău njroh mprơ uĕh. Ăp nghệ sĩ, diễn viên n’hanh ăp ntŭk kan nsrôih lĕ soan nơm gay ƀư lôch uĕh.

Sŏk nău ŭch bah rnôk hun hao nkual neh n’hanh kon nuĭh, mpôl nghệ thuật n’gor Bình Dương râng tâm nđŭr njroh mprơ lam dak rơh 2, năm 2021 đah bôk nău nghệ thuật “Bình Dương-Đất ấm-tình người”. Lôch 2 chương “Miền đất ấm” n’hanh “Tình người”, nuĭh uănh dơi gĭt tĭng lvang tâm rnôk hun hao bah ƀon lan, bah nău ơm mpeh rnôk hôm e muih bri ƀư mir, ndâk njêng ƀon tơm đah âk ƀon nău kan way ơm. Tât ăp lvang công nghiệp mhe, rgâl mhe, rnôk Bình Dương jêng nkual ƀon têh công nghiệp, ntŭk rgum bah nuĭh ƀon lan bâh lam neh dak tât rêh, ƀư sa.

Du ntŭk kan djôt tât tâm nđŭr du nău uĕh êng, ntĭt mpơl tĭng nkual.

Wa Trần Thanh Sơn, Kruanh Trung tâm văn hóa-Nghệ thuật n’gor Bình Dương, ntĭm rđău nghệ thuật, kịch bản n’hanh đạo diễn bôk nău kan an gĭt, đah ăp nkô̆ njroh mprơ, bôk nău kan rgum  rlău 70 nghệ sĩ, diễn viên, ca sĩ, cán bộ nuĭh kan râng njroh mprơ n’hanh ntop ndơ sông sa.

“Aơ lah du rơh tâm rlong njroh mprơ chuyên nghiệp jêng an geh nău ntuh kơl n’hanh ăp bôk nău kan tiăr nti bah mpôl hên geh rlău 2 khay. Uĕh đah nghệ thuật âm nhạc ri mpôl hên dŏng ăp nău ngơi bah Bình Dương, n’ăp ndơ kreh, gŏ, uh lah ndơ bah Bình Dương, ntĭt nsa kơt yăng, gri, ngan rchŏk n’hanh ăp dĭng nkar, mô lah ăp si mpôl hên tâm rgop tay jêng du ndơ gŏ rnoi mpôl đêt, gay ƀư du nău uĕh lah Bình Dương moh ndơ geh lah pâl ndơ nĕ”.

Tâm nđŭr njroh mprơ lam dak rơh 2 năm 2021 geh 22 mpôl nghệ thuật đah rlău 1.000 nghệ sĩ, diễn viên n’hanh cán bộ nuĭh kan ƀư nghệ thuật ta lam dak râng. Bôl srê Covid-19 khuch dŭt têh tât ăp nău ƀư nghệ thuật yơn ăp ntŭk kan lĕ geh ân nău nsrôih, mĭn ƀư tâm nău ndâk njêng bôk nău kan, nău mprơ đah âk ntil. Rlet rlău jêr jŏt, đêt yor khuch bah srê n’hanh mông nar tiăr nti ndăn, ăp nghệ sĩ lĕ nsrôih dŭt n’hâm gay dơi geh âk nău njroh mprơ uĕh ngăn. Ca sĩ A Tâm, mpôl nghệ thuật n’gor Kon Tum nkoch:

“Râng rơh aơ pơng êng lơn. Yor jêh yan srê, lĕ rngôch ăp nău ƀư nghệ thuật lah êng n’hanh ăp nău ƀư êng lah nsum ri tât tâm nđŭr rơh 2 aơ ăp nghệ sĩ dôl kâp da dê. Nĕ lah lĕ nău nsrôih bah nsum mpôl, bah mpôl ntĭm rđău, bah ngih pah kan, ntŭk kan n’hanh n’ăp nai ntĭm lĕ pah kan du trong rjăp, dŭt n’hâm tâm đêt nar mô jong yơn ăp nuĭh lĕ tâm ban ŭch”.

Ăp nău njroh mprơ dơi ntuh kơl uĕh đah ăp trong ndơ djăt uănh.

Mô knŭng đah ăp ntŭk kan râng tâm nđŭr, nău kan văn hóa nghệ thuật n’gor Dak Lak dŭt nsrôih gay ƀư uĕh nău ƀư tơm bah ntŭk kan rdâk ƀư. Tĭng wa Đặng Gia Duẩn, Groi Kruanh N’gâng kan Văn hóa-Thể thao n’hanh Pâl nđaih n’gor Dak Lak, bôl tâm nău geh ndoh ndơ hôm e đêt nkôp đah nău ŭch nghệ thuật bah âk ntŭk yơn n’gor lĕ nsrôih gay wơt n’hanh pă mông nar uĕh ngăn an hang rbăn nghệ sĩ râng njroh mprơ, tâm di nău ŭch bah ăp rmôt gay dơi ƀư lôch uĕh ngăn. Wa Đặng Gia Duẩn lah:

“Trong kan nchrăp an tâm nđŭr du trong dŭt nchrăp lor, lĕ rngôch nkô̆ nău tâm nđŭr tât ndoh ndơ, nău nteh, ŭnh ang, ntŭk gŭ âm, ndơ sông sa tât ăp nkô̆ nău êng ri Dak Lak lĕ tŏng ăp nău ŭch tât ăp nău đă têh bah ăp rmôt. Tĭng uănh lah bah ăp rmôt ri tât mông aơ nuĭh tơm jay Dak Lak lĕ ƀư dŭt uĕh nău kan bah ntŭk rdâk ƀư”.

Ƀư bah nar 17 tât lĕ nar 30/6, tâm nđŭr njroh mprơ lam dak rơh 2, năm 2021 geh bơi 200 nkô̆ nău njroh mprơ geh lĕ rngôch ăp ntil kơt mprơ, njroh, gŏ, gâr gông, cải lương, nău mprơ ngơi lơn, chèo, tuồng. Du nău mprơ jŏ bah 65 tât 100 mnĭt lĕ djôt tât an nuĭh uănh ăp nău nkoch mpeh nău rêh đah nghệ thuật dŭt n’hâm uĕh. Nĕ lah nău geh pah kan n’hanh nău nsrôih, bah ăp nghệ sĩ, diễn viên, ăp ntŭk kan nghệ thuật gay rgop tâm nău lôch uĕh n’hanh rêng hvi bah tâm nđŭr, ndơ̆ ăp ntil nghệ thuật tât êp lơn đah nuĭh ƀon lan.

          Nuĭh rblang: Y Sưng Phê Ja