Tâm trôm Nar rgum gâp rŏng neh dak gâp, Tỉnh đoàn Dak Lak hŏ ƀư Tâm rlong druh ndăm mpât mprơ n’hanh uh goh way ơm bah rnoi mpôl đê̆. Ăp đơn vị hŏ mpơl âk nău mpât mprơ uĕh, săk tơm nkual ƀon lan. Âk nuĭh tâm rlong nkoch, ma rơh tâm rlong, khâl păng hŏ geh âk nău dêh rŏng lơn n’hanh ŭch rêng lam văn hóa rnoi nuĭh he nơm.

Ta nău nteh ndơ uh goh khuh n’gôr, 6 bu druh Mông tâm ndơ nsoh gŭr ntơr jôn rbăn múa điệu Sênh Tiền. Yuh Ma Thị Huế, ta xã Cư Króa, nkuâl Mđrăk, nkoch: Sênh Tiền lah du nău múa ơm yău bah nuĭh Mông, way dơi dŏng tâm ăp rnôk lễ, tết mô lah nar ngêt sa têh. Bol ma kơt nê, ta ntŭk ƀon mhe Dak Lak, ntil múa dja đêt geh an uănh saơ. Tât rnôk geh rơh tâm rlong druh ndăm mpât mprơ n’hanh uh goh rnoi mpôl đê̆ ri ăp yuh mơ dơi nti n’hanh gĭt wât âk lơn mpeh ntil múa uĕh êng dja.

Rmôt hên 6 nuĭh, nti rlău du khay ri mơ dơi kơt aơ. Aƀaơ nti lah ăp bu ranh ntĭm dơm. Gâp saơ dŭt n’hao êng săk, rnôk nti nău dja gâp gĭt lah rnoi nuĭh he geh du rup uĕh văn hoá dŭt uĕh reh dĭl. He gĭt lah săk tơm rnoi nuĭh, văn hóa bah he geh dŭt âk đŏng, he  mô hŏ joi gĭt lĕ.

Hôm đah oh H Chuyên Knul, ta buôn Mblơt, xã Ea Bông, nkuâl Krông Ana, rơh tâm rlong lah rnôk gay mpơl nău n’hao êng săk đah nău chĭng gong uĕh êng bah nuĭh Rđe Bih. H Chuyên nkoch, bah khay rlu nti năm bah năp nơh, gâp nti goh gong Jhô. Đah nău ntĭm nti bah ăp nuĭh gĭt blău ta ntŭk, gâp gĭt dơn geh nuĭh Rđe Bih mơ geh gong Jhô an êng ma bu ur goh.

Gâp saơ ŭch rŏng rnoi nuĭh he nơm lơn n’hanh văn hoá  bah nuĭh nuĭh he nơm lơn. N’hanh gâp ŭch rŏng rêng lam nău way ơm văn hóa bah rnoi nuĭh he tât lĕ rngôch ăp nuĭh.

 Rơh tâm rlong druh ndăm mpât mprơ n’hanh uh goh rnoi mpôl đê̆ lah du nău kan tâm trôm Nar rgum gâp rŏng neh dak gâp tă bah Tỉnh đoàn Dak Lak  ƀư. Bơi 30 nău mpât mprơ, 300 diễn viên mô way mpât mprơ lah ăp đoàn viên, druh ndăm n’hanh kon se jê̆ ta 15 nkuâl, thị xã, nkual ƀon têh tâm n’gor hŏ mpơl ăp nău mpât mprơ, nău múa way ơm, nău uh goh bah ăp rnoi mpôl đê̆ ta âk nkual ƀon lan lam dak. Ntơm bah ăp nău uh goh way bên lah gong Jhô, gong kông, đơn T’rưng, mbuăt đing năm tât nău nteh đàn tính, n’hôm mèo, ăp nău mprơ ay-ray, mprơ then, mprơ lý, ví dặm, mprơ Nam bộ … hŏ njêng du măng njroh mprơ khuh n’gôr, uĕh êng. Yuh H Tuyết Niê, ta buôn Cuôr Dăng A, xã Cuôr Dăng, nkuâl Cư Mgar lah:

Tâm ăp rơh tâm rlong kơt aơ ri nta geh dŭt âk trong an ăp băl kơt nti tay âk nău tă ơm gĭt kan lơn bah ăp mpôl êng ƀa ƀă. N’hanh kơl he geh tay âk nău gĭt lơn gay tâm ôp tâm rgâl, geh nău gân djăng đah tŭr chĭng goh gong hôm djăt năl dơi âk ndơ uh goh bah rnoi mpôl đê̆ gĭt wât âk lơn mpeh ăp ndơ uh goh rnoi nuĭh he nơm.

Tĭng uănh năl bah Ban giám khảo, rơh tâm rlong  hŏ mpơl dơi  nău âk ntil mpeh săk ntơr văn hóa bah ăp rnoi nuĭh dôl gŭ rêh ta Dak Lak. Ăp nău mpât mprơ geh nău ntuh kơl lĕ mpeh sơch nkô̆, ndơ nsoh n’hanh trong rdâk ƀư. Ndrel đah nê, nău nđơn tay ta ăp rmôt tâm rlong hŏ mpơl kloh rnôk geh nău rgop bah ăp kon se jê̆ tâm âk nkô̆ nău mpât mprơ mpôl. Wa Lê Văn Hồng, nhih nti Cao đẳng Văn hóa Nghệ thuật n’gor Dak Lak, Kruanh Ban Giám khảo rơh tâm rlong an gĭt:

Ban giám khảo năm aơ rnê âk nău râng bah ăp rmôt, lơn lah gâl tâm rlong gay uh goh nău rnoi mpôl đê̆, an tay âk nău nkah uĕh n’hanh âk nău mpât mprơ dŭt săk ntơr uĕh. Lơn lah ăp nkô̆ nău mpât mprơ tât râng bah ăp kon se jê̆ mpeh ăp nkuâl jru ngai kơt nkuâl Krông Bông, Lắk. ăp kon se bol hôm jê̆ yơn ma phôl huêng tâm ăp nău  mpât mprơ n’hanh ăp nău ngơi êng, nău múa, nsĭt tay nău dơi nsum an nar tâm rlong.

 Nău dơi bah nar tâm rlong hŏ rgop rdâk tay n’hanh rêng lam tâm đoàn viên, druh ndăm, kon se jê̆ Dak Lăk nău ŭch rŏng ăp ntil nău mpât mprơ, văn hóa way ơm, gay mât ndray n’hanh ntik n’hao tay./.