Tâm bri duh sang rngach bah yan wai Tây Nguyên, ăp nău nteh n’gôr bah nău njroh Lăm Vông, nteh gâr, nteh chĭng, nsum mpôl tu tơm Lào ntŭk aơ n’gŭr răm lăp tâm rơh lễ têh ngăn tâm năm. Tết Bunpimay, mô dah Tết rsach dak lah tết ntơm bôk năm mhe tĭng Phật lịch n’hanh rơh an jut rao nău mô lap, dăn đăp mpăn, uĕh lăng.

Wa Lê Văn Nuôi, Groi Kruanh UBND nkuăl Buôn Đôn an gĭt, năm aơ Tết Bunpimay ta Buôn Đôn hôm geh nău ƀư tâm trôm nkah gĭt 30 năm ndâk njêng nkuăl Buôn Đôn, 50 năm nar rklaih đăp mpăn miền Nam, kơp dơn neh dak, wơt rhơn rach năm hun hao mhe đah nău ƀĭt joet bah n’gâng kan bah dâng 2 gưl.

Năm aơ nkah gĭt ăp nar têh năm kôp, nkô̆ nău tay lah năm aơ lah năm n’glêh dŭt ntlơi n’gâng kan nkuăl, yor nê ŭch n’glơi tay n’gâng kan xă ri khân pơng mbra mât trêng nkô̆ nău way ơm aơ. Năm aơ ƀư âk nău êng ntĭt nsa nkoch trêng gôl dak Trường Sa, Hoàng Sa bah Việt Nam, 2 tay mbra geh mpôl nghệ thuật bah nkuăl Lắk gay tâm nđŭr văn hóa đah nuĭh Bunong đah nuĭh Lào.

Ndrel đah nsum mpôl kônh wa nuĭh Lào, âk mpưm rnoi nuĭh oh nô dôl rêh ta Buôn Đôn tât răm nsum tâm rơh tết Bunpimay. Yuh Vy Thị Mới, rnoi nuĭh Nùng, ta xă Ea Bar nkoch nău răm bah nơm rnôk dơi râng ăp nău ƀư kơt kăt rse brai ta ty, ŭm Phật n’hanh rsach dak:

Rơh bôk năp gâp dơi râng du rơh Tết Lào dŭt răm, mông nar dŭt gơih nđơr, gâp dơi kăt rse brai ta ty ntĭt mpơl bah nău lam n’hanh nsĭt tay âk nău uĕh lăng tâm nău rêh.

Kăt rse brai ta ty, tĭng nău way nuĭh Lào, lah nău ƀư brah têh tâm nar Tết, rnôk sư thầy mô lah nuĭh ranh mbra kăt du rse brai ta ty nuĭh êng n’hanh dăn an uĕh lăng an khân pơng. Ăp nău ƀư ŭm Phật, mbuh choih mô lah rsach dak geh nău khlay nuih n’hâm n’hanh nău rêh kon nuĭh jru hvi. Rblang mpeh nkô̆ nău bah ăp nău ƀư brah aơ, nô Y Nô Ly Kbur, nuĭh Lào rêh ta xă Krông Na, an gĭt:

Rnôk he kăt rse brai ta ty ăp nuĭh sư thầy mbra dăn an he gay he geh nău lap lơn, hôm mbuh choih ri he mbra mbuh choih nĕ lah nău tâm rnglăp đah ăp rnoi nuĭh, hôm rsach dak gay he dơi jăng lơi ăp nău rngot njê, ăp nău mô uĕh tâm nău rêh bah he gay an he geh du nău rêh uĕh lap n’hanh răm m’ak lơn.

Tết Bunpimay ta Buôn Đôn lơ n’gŭr răm yor nteh bâr gơm tâm rnglăp ndrel đah nteh chĭng gông n’hanh nău njroh Lăm Vông-nău way ơm. Yuh H’Ưng Êban, ta ƀon Yang Lành, xă Krông Na, nkuăl Buôn Đôn:

Gâp râng Tết Lào lĕ năm tal 4 hôm, năm aơ nkuăl ƀư đah âk n’hanh dŭt têh n’hanh dŭt âk kônh wa râng. Gâp saơ bôk nău ƀư Tết Lào aơ geh nkô̆ nău dŭt têh, hăn ndrel đah kon nuĭh, boăt nthoi ăp rnoi nuĭh ndrel. Gâp saơ dŭt răm, kơt aƀaơ chĭng gông Lăm Vông dôl nteh n’hanh săk gâp dôl ŭch njroh mpât hôm.

Mô knŭng lah ntŭk rgum văn hóa, tết Bunpimay hôm nkah tay ăp nău ơm jru hvi mpeh nău tâm rnglăp têh đah 2 rnoi nuĭh Việt-Lào. Đah wa Đinh Công Trình, tahen ơm tă tâm lơh tâm su ta Lào bah năm 1969-1973, aơ lah rơh nkah gĭt têh ngăn:

Ta năp đaơ mpeh đah ri dơi ntop kơl bah kônh wa Lào bah bôh sa, dak ngên, đê̆ đŏng kop ji dơi kônh wa mât rong. Nar aơ tât bah năp dơi râng lễ hội aơ saơ dŭt uĕh, dơi nkah gĭt tay, nkah gĭt n’hâm soan bah ăp kônh wa rnoi nuĭh Lào n’hanh mpŏng Đảng ngih dak 2 ding uănh tât ndâk njêng nău tâm rnglăp Việt Nam-Lào mro mrăng uĕh lăng mro mrăng nâp nâl.

Têt Bunpimay,way ơm nuĭh Lào ta Buôn Đôn-mô knŭng lah nar rgum bah du nsum mpôl, ma hôm lah ntĭt mpơl uĕh lăng bah nău tâm rnglăp, nău tâm nđŭr văn hóa đah ăp rnoi nuĭh oh nô ta nkual neh n’har bri uĕh tam bah n’gor Dak Lak.