Kônh wa n’hanh lĕ băl mpôl mhe djăt bâr nghệ nhân Y Nguk Niê mprơ eirei. Nău mprơ rnê ƀon lan răm m’ak, ƀư âk nuĭh djăt răm m’ak tay, nsing nơm nău rŏng tâm nău rêh, ntĭnh nta kônh wa gĭt uănh khlay, mât njrăng bri dak, drâm dak bah ƀon.

Rlău ma ăp nău mprơ mpeh ƀon tơm, neh dak, nghệ nhân Y Nguk Niê hôm gĭt mprơ âk nău mprơ tâm ơh hôr mpeh nău tâm rŏng druh ndăm, nău ntĭnh ntă kon se gơih nđơr nti nsơm gay bah kơi aơ rgop ndâk njêng ƀon lan ndrŏng uĕh lơn.

Nghệ nhân Y Nguk Niê deh n’hanh têh tâm du rnăk wâl geh u, che, me bơ̆ lah ăp nuĭh gĭt nău mprơ. Bah rnôk hôm e jêt, nău mprơ n’hir, rnôk răm bah nău mprơ Êđê lĕ lăp jru tâm bôk rngok bah wa. Ăp rơh tĭng mê̆ hăn tâm mir, lah ăp rơh dơi djăt bơ̆ uh mboăt uh n’hôm ndrel đah nău mprơ n’glôh ƀư roh nău ŏk r’ah đah duh r’ôl. Nghệ nhân Y Nguk Niê nkoch, ăp nău mprơ lah nău ntrŭt nsôr têh an nơm n’hanh kon sau tâm rnăk wâl, yor tă bah nău mprơ nteh nkre djôt tay nău răm an nơm, an nuĭh bên n’hanh tă bah nĕ lah ăp nău ntĭm nti, ntĭnh ntăn kon sau tĭng trong hăn bah Đảng, ngih dak.

“Gâp blău mprơ Eirei, blău tŭr chĭng. Ăp rơh mprơ nău mprơ Êđê gâp saơ dŭt răm. Nău mprơ Êđê geh mprơ Kưt, Eirei. Nĕ lah ăp nău mprơ rnê Đảng, ngih dak, mô djăt tĭng nău m’hĭk phah ƀon lan, ntĭnh ntăn gơih nđơr pah kan jan sa, kon sau nti nsơm”.

Mô knŭng dơi mprơ âk nău mprơ, nghệ nhân Y Nguk hôm gĭt uh mboăt, n’hanh lah nuĭh bah rmôt chĭng xă Čư M’gar, nkuăl Čư M’gar. Đah nău ŭch rŏng dơi trêng ntĭm tay nău uĕh nău mprơ an rơh bah kơi, nghệ nhân Y Nguk Niê ndrel đah ăp ngih nhân tâm ƀon nsrôih râng ăp jrô trêng ntĭm nău mprơ, tŭr chĭng ta ntŭk. Nghệ nhân Y Nguk Niê an gĭt tay:

“Mpôl hên ăp nuĭh nghệ nhân âk năm deh geh dŭt âk nău rvê. Âk nghệ nhân âk năm deh lĕ sĭt đah u che yău ye. Mpôl hên lah ăp nuĭh hăn lor dŭt ŭch trêng ntĭm tay an kon sau. Mprơ Eirei mô lah mprơ Kưt, tŭr chĭng mô lah ăp mboăt n’hôm êng. Ăp ntil tâm nar tâm nđŭr njroh mprơ bah ƀon, xă mô lah khĭt ôm... mpôl hên geh măt da dê”.

Rvê đah văn hóa rnoi mpôl nơm geh roh rui, đah nău ƀư tơm lah kruanh ƀon Huk B rlău 25 năm aơ, nghệ nhân Y Nguk Niê tâm rgop ntĭm kônh wa gĭt uănh khlay nău uĕh rnoi nơm tă bah ăp nar rƀŭn. Yơn gay dơi ƀư nău nĕ kônh wa an nsum soan, nsum nuih n’hâm gay nteh chĭng, nău Kưt, Eirei hôm e n’glôh nteh mro an rơh bah kơi. Nghệ nhân Y Nguk Niê an gĭt tay.

“Aƀaơ Ngih dak uănh mĭn kônh wa he mât ndrăy chĭng gông, nău mprơ, nău ngơi... bah rnoi nơm. Nău nĕ an saơ ngih dak uănh mĭn tât kônh wa he dŭt âk. Mô chuêl nău way ơm bah nuĭh Êđê he. He an ntĭm tay kon sau, lơn lah rnoh năm deh bah 7-8 năm bah ăp nghệ nhân kơt mpôl hên”.

Mĭn hăn êng n’hanh nău ŭch, nuih n’hâm lĕ nău kan, nghệ nhân Y Nguk Niê ta ƀon Huk B, xă Čư M’gar, nkuăl Čư M’gar, n’gor Dak Lak dôl tĭng nar kơl an kônh wa gĭt khlay nău mprơ, nteh mboăt n’hir, nteh chĭng n’gôr răm... Knơm geh ăp nuih n’hâm, gĭt đah văn hóa rnoi đêt kơt nghệ nhân Y Nguk Niê lĕ rgop mât ndrăy, rêng hvi nău khlay, nkô̆ nău văn hóa rnoi mpôl đêt ta ntŭk.