Nău pah kan ta ngih nti Tiểu học Hoàng Diệu, xã Cư Né, nkuăl Krông Buk, n’gor Đăk Lăk geh rlău 10 năm, nai nti H Luê Buôn Krông way geh ngih nti knơm pă nău kan ntĭm nti an kon hoc nti jrô 1- lah jrô bôk năp nti gâl 1 tâm bôk nău ntĭm nti gâl phổ thông. Nai nti H Luê nkoch, rlău 65% kon hoc bâh nơm lah nuĭh rnoi đê̆ jêng rlău ma trong kan way ơm, yuh lĕ tât kơt ăp nău ntĭm nti mhe ta Internet, tâm rgop dŏng nău ngơi Việt - Êđê gay ma kon hoc geh gĭt vât n’hanh gĭt nău nti.

“Nău dŭt jêr jot ngăn aƀaơ rnôk nti an ăp oh lah ăp oh ê hŏ git rplay săm ƀŭt, rnoh mbrô, tâm rnôk nti rĭ ăp oh mô gĭt vât nău Việt jêng kañg bên nău ngơi nơm jêng nău tâm ngơi, ntĭm nti an ăp oh jêr đŏng. Lap lah gâp lah nuĭh Rđe, dŏng bar nău ngơi tâm rnôk ntĭm nti gay ma ăp oh dơh vơt n’hanh gĭt nău nti ueh lơn.

Lĕ geh uănh kơt joi gĭt nău kan, dŏng ăp trong nti mhe, nai nti Y Bih Êban, ngih nti THCS Phan Chu Trinh, xã Cư Né, nkuăl Krông Buk nsrôih dŏng lĕ ăp trong kan kĩ thuật, ndơ dŏng nti lĕ geh năp dŏng ta ngih nti gay ma nău nti geh gĭt vât lơn. Nai nti Y Bih an gĭt, ta ăp rơh nti, nô nchrăp dŭt ueh nău nti, hao uănh ta mạng joi âk rup na nê̆, nău ntt an nău nti, tâm rgop đah trong nti nkre pâl nkre nti, tâm hôr, tâm ôp ngăch gay ma mông nti geh ueh nđơr. Bâh nĕ kon hoc gơih nti lơn n’hanh dơh vât nău nti lơn.

Ngih nti geh năp ăp ndơ nti mpeh công nghệ kơt tivi, máy pơk rup ri mpôl hên gegh dng pơk ăp rup sŏng dăng gay ma kơl an ăp oh geh uănh gĭt na nê, rup kan na nê̆ rĭ bâh nĕ gĭt nău nti ngăch lơn”.

Đah trong kan ntĭm nti mhe, geh ueh kơt aơ, ăp mông nar lĕ jêng ueh lơn, geh kon hoc dŭt nđơr gơih. Oh H Na NI Mlô, jrô 9C, ngih nti THCS Phan Chu Trinh xã Cư Né, nkuăl Krông Buk nkoch, ăp mông nti mô hôm geh jêr dâl n’hanh ăp nău nti ma ăp oh geh nti dŭt dơh vât tâm di đŏng.

“Ăp nai nti ntĭm nti dŭt dơh vât, na nê̆, nti ueh. Gâp nơm lĕ nsrôih nti ahn ueh gay ma tâm rlong nglâ̆ dŭt rơh nti an geh nău dơi âk n’hanh dơi lăp ta jrô 10”.

N’gor Đăk Lăk aƀaơ geh bơi tât n’gul rkeh kon hoc bâh nti mầm non tât phổ thông cơ sở. Uănh năl ntĭm nti lah ngoăy tâm âk nău mpŏng kan dŭt khlay ta trong rdâk njêng nkual ƀon lan mhe, tâm ba năp nơh, n’gor lĕ geh âk trong kan, nău kan ueh di mpeh ntĭm nti, hun hao ăp jrô nti n’hanh pơk hvi nău ntĭm nti đŏng.

Tĭng nău mbơh bâh wa Nguyễn Tường Hiệp, Groi Giám đốc ntŭk kan ntĭm n’hanh nti Đăk Lăk, 70% ăp ngih nti bâh mầm non tât THCS ta n’gor lĕ geh nth kơl rdâk njêng nâp ueh, năp tŏng ăp ntil ndơ ntĭm nti. Ăp ngih nti ƀư tĭng ueh rnoh mbrô 14 mpeh ntĭm n’hanh nti, mât đăp mpăn ntĭm nti tay gâl THCS đah rnoh kon hoc lôch nti gâl nti geh bâh 70% let lơ. Gay ma n’hao nău ueh ntĭm nti, ngăn lah ta ăp nkual njônh ngai, nkual ƀon lan rnoi đê̆, wa Nguyễn Tường Hiệp an lah nău n’hao nău dơi mpôl pah kan ntĭm nti an geh uănh khlăy tay.

“An geh n’hao nău ntrôl hun hao mpôl kan nai nti, ngăn lah nai nti rnoi đê̆ an tâm di đah nău dơi geh, nău gĭt vât, nău blău kan gay ma dơi geh ntĭm nti n’hanh nti kon hoc an săk rnglăy. Ntrôl nău rgâl mhe rnoh mbrô, dŏng công nghệ thông tin n’hanh nău gĭt blău kon nuĭh ta nău ntĭm nti n’hanh nti tâm ăp ngih nti. An geh uanh nđôi gay ma pă dăp tay nău kan ta ngih nti, jut jăng ăp ntŭk ngih nti êng mô tâm di n’hanh rdâk njêng ntŭk ngih nti ueh, rgum lĕ ăp mpôl kan ta ntŭk rêh jêng gay ma kơl an trong kan rgâl mhe”.

Ndrel đah nău nsrôih bâh n’gâng kan, ntŭk kan têh, ăp nai nti ta Đăk Lăk, ngăn la ta ăp ntŭk jêr jŏt dôl nsrôih tĭng ngih nti, tĭng jrô nti ƀư ueh jăp ăp nău kan Ntĭm nti kon nuĭh , rdâk njêng rnoh nuĭh kan tât râng hun hao ƀon tơm neh dak.