VOV4.M’nông: Tâm pơh rlau aơ, tâm nkuăl Tây Nguyên (ngăn lah ta Dak Lak ndrel Kon Tum) mro geh nŭih kơp dơn lah ntưp ma srê Covid-19, tâm nê rvê ngăn lah ăp nŭih ji ntưp tâm ƀon lan. Bah năp nau aơ, n’gâng kan ndrel rmôt kan nau dak si hŏ n’hao nau njrăng rdâng srê ntưp. Rmôt nau dak si bah Ngih dak si Chợ Rẫy kŏ tât Dak Lak gay ma kơl an nau njrăng rdâng srê Covid-19.

Tâm n’gor Kon Tum, jêh ntoh âk nŭih ntưp ma srê SARS-Cov2 tâm ƀon lan, ntơm pơh bah năp nơh, rmôt kan bah n’gor ntơm njrăng, nchueng, joi ăp nŭih F1, F2, F3 gay ma njrăng nau ntưp srê Covid-19 tâm ƀon lan ndrel ntŭk nkhah rgum. Jêh nê, UBND n’gor Kon Tum hŏ rƀŭn trực tuyến đah 10 nkuăl, nkuăl ƀon têh ndrel 102 xã, phường, nkuăl têh bah n’gor. Ntoh nau ta nar rđau ndal nau aơ, wa Lê Ngọc Tuấn, Kruanh UBND n’gor Kon Tum đă ăp nkuăl ƀư ueh nau nchueng rdâng srê, ndrel ma nê ƀư ân ueh nau kan nkân njrăng nau ntưp rêng bah srê Covid-19 tâm ƀon lan ndrel tâm ăp ntŭk nkhah rgum:

‘Ăp ntŭk nkhah rgum âk nŭih, mra geh nau tâm ntưp ndrăng nơm tâm ntŭk dôl nkhah. Rmôt mât nkuăl geh nkhah ân geh n’hao nau mêt uănh tâm ntŭk nkhah rgum, ntŭk nkhah săm. Nkah tâm ngih ƀư ueh nau kan rmôt Covid tâm ƀon lan, n’ăp ma ntỏng kan chính trị uănh. Lah saơ nŭih geh nkhah tâm ngih mô ƀư ân rjăp ri đă ân geh leo nkhah rgum”.

Tâm rơh tâm nchră nau kan báo chí tâm khay 10 mhe rlau, geh Rnâng kan Tuyên giáo n’gor uỷ Kon Tum, wa Nguyễn Đình Cầu, Groi Chánh văn phòng UBND n’gor Kon Tum, mbơh, nkuăl dôl mât nau nkân njrăng srê tâm trong lăp tâm n’gor. Aơ lah ăp ntŭk nkân njrăng srê mô di lah ntŭk uănh nau hăn ro ndeh klơ ri n’gor mô rơih lơi. Nau ngăn ân saơ, rmôt kan hŏ saơ âk nŭih ntiưp ma srê Covid-19 tâm ntŭk nkân njrăng nŭih mrô 1 Sao Mai, nkuăl ƀon têh Kon Tum ndrel ntŭk nkân njrăng srê mrô 2 yôk Lò Xo, nkuăl Đăk Glei tâm trong Hồ Chí Minh. Đah nau ntưp srê Covid-19 tâm ntŭk nkhah rgum ndrel tâm ƀon lan, wa Nguyễn Đình Cầu, Groi Chánh văn phòng UBND n’gor Kon Tum, mbơh:

‘Jêh rnôk tâm nkhah rgum 14 nar ri ntŭk nkhah ne êgh âk nŭih xét nghiệm 3 tŏ ma kŏ mô saơ ntưp. Yơn lah geh nŭih sĭt 2, 3 nar ba kơi, jêh ri 5, 6 nar jêh nê ri ntơm geh nau ntưp ma srê. Nau aơ ndơ̆ lih nau kan mpeh nar ma păng mpăm nau ji, jêh ri êng nê hôm đŏng nê lah mô gĭt ntŭk păng geh ntưp đŏng lah mô. Nua kan tal bar jêh rnôk hăn nkhah rgum sĭt nkhah êng tâm ngih ri ê geh ƀư rjăp nau ntrŭnh đă, mô ân ƀư nau ntưp rêng tâm ƀon lan. Nau kan ma ăp rmôt Covid-19 tâm ƀon lan ê ƀư rjăp nau kan bah nơm”.

Bah năp nau nŭih ƀon lan lôch nar nkhah rgum sĭt nkhanh êng, uănh n’hâm soan tâm ngih mơ saơ nŭih ntưp ma srê Covid-19 ƀư jêng nau ntưp rêng tâm ƀon lan, du đê̆ nkuăl, nkuăl ƀon têh bah n’gor Kon Tum bonh đă nŭih ƀon lan ŭch êng nau đăng kí gŭ tay tâm ntŭk tâm nkhah rgum 7 nar đŏng.

Tâm Dak Lak, pơh rlau aơ jêng ntŭk geh âk ngăn nŭih ntưp ma srê Covid-19, rnôk saơ âk nŭih ntưp tâm ƀon lan, ngăn lah tâm nkuăl ƀon têh Buôn Ma Thuột. Ngăn lah geh du nar saơ geh 174 nŭih ntưp ma srê Covid-19, aơ lah rnoh nŭih ntưp âk ngăn kơp ntơm rnôk ntoh srê tal 4. Tâm nê, âk nŭih ntưp tâm ƀon lan, ngăn lah tâm ăp nkuăl Cư M’gar, Krông Búk, nkuăl têh Buôn Hồ ndrel nkuăl ƀon têh Buôn Ma Thuột.

            Bah năp nau nê, pơh rlau aơ, rmôt nai dak si bah ngih dak si Chợ Rẫy hŏ tât Dak Lak gay ma kơl an njrăng srê Covid-19. Tâm mông ôi nar bôk năp tât Dak Lak, rmôt nau dak si bah Ngih dak si Chợ Rẫy hŏ geh nar pah kan đah rđau kan ndrel rmôt nai dak si bah Ngih dak si Đa khoa nkuăl Tây Nguyên. Nai dak si Nguyễn Đại Phong, Giám đốc Ngih dak si Đa khoa nkuăl Tây Nguyên mbơh: Ăp nau rgop bah rmôt nau dak si tât ƀư nau kan săch, nkhah ndrel săm nŭih ji mra kơl an ngih dak si ƀư ueh lơn tâm nau kan săm ji srê Covid-19:

            ‘Rmôt nŭih nai dak si Chợ Rẫy geh âk nau blau ngăn tâm nau săm ân nŭih ji Covid-19 tâm nkuăl ƀon têh Hồ Chí Minh kŏ kơt lah tâm miền Nam, miền Trung rnôk aơ bu hŏ kơl an ân Ngih dak si Đa khoa nkuăl Tây Nguyên saơ dơi ăp nau ê nâp ma ngih dak si nơm ê geh ƀư. Nau khlay rnôk aơ lah khân păng mra kơl an Ngih dak si mpeh nau săm ndrel ăp ntil ndơ máy móc kŏ kơt lah dak si mô tŏng ri khân păng mra geh nau đă kơl an tă bah Ngih dak si Chợ Rẫy kŏ kơt lah n’gâng kan dak si”.

            Pơh rlau aơ, rmôt nŭih nai dak si bah Ngih dak si Chợ Rẫy hŏ ntơm hăn uănh tâm ăp ngih dak si ndâk leo săm, ăp ntŭk nkhah săm, ntŭk nkhah rgum, rgop nau ân nau ndâk njêng nau ƀư nau kan lah geh tât ân n’gor tâm nau pă nau săm, pă nŭih ji nơm njrăng, râng ăp rơh rƀŭn đah Rnâng kan rđau nau kan njrăng, rdâng srê Covid-19 n’gor Dak Lak, rƀŭn đah ăp rmôt nŭih nai dak si ndrel rđau kan bah n’gor, ăp ntŭk kan ngih dak si...ndrel rnôk aơ, ăp nai dak si, điều dưỡng bah Ngih dak si Chợ Rẫy lŏ gŭ tay du pơh đŏng gay ma kơl an n’gor Dak Lak tâm nau njrăng, rdâng srê ndrel mât chăm, săm ji ân nŭih ntưp srê Covid-19./.

                        Nŭih rblang: H’Thi