VOV4.M’nông – Ôi 26/10, Thủ tướng Chính phủ Phạm Minh Chính leo mpôl Ntoh măt gưl prêh Việt Nam râng ƀư tĭng trong trực tuyến Rƀŭn nchră gưl prêh Hiệp hội ăp dak Đông Nam Á rơh tal 38 (ASEAN 38) tĭng nău jă bah Kđăch dak Brunei Hasanal Bolkaih, Kruanh ASEAN năm 2021. Rƀŭn nchră aơ di an Việt Nam mĭn lah tay trong hăn tâm rnglăp đăp mpăn, ƀư tơm, âk ntil, âk trong tâm rgop, rgum lăp lam ntŭr neh lĕ rngôch n’hanh jru hvi. Ntoh ngơi ta rƀŭn nchră, Thủ tướng Chính phủ Phạm Minh Chính an lah, ndrel đah nâp nâl nău lĕ dơi geh, ntrôl dăng tâm rgop nkual, ndâk njêng nsum mpôl, an uănh năl ntŭk gŭ dâk mhe bah ASEAN tâm nău tâm ban ăp nău tâm boh wăng sa-chính trị dôl ndâk njêng tay bah lam ntŭr neh. Nsum mpôl ASEAN an nâp nâl ƀư tơm lah nău khlay bah trong ƀư tâm nchră, kan ndrel n’hanh tâm rgop wăng sa ăp ding, tĭng gưl nkual. Gay râng jru lơn tâm ăp trong tâm pă nkual n’hanh lam ntŭr neh, n’hao uĕh bah ntŭk tăch rgâl ASEAN n’hanh ntrôl dăng tâm rnôk rdâk hao wăng sa jêh chôt srê.

Lôch rnôk geh tât râng rƀŭn nchră gâl têh ASEAN 38, Thủ tướng chính phủ Phạm Minh Chính leo bôk năp mpôl Đại biểu gâl têh Việt Nam tât râng rơh rƀŭn nchră gâl têh ASEAN 39. Ntoh ngơi ta rơh rƀŭn nchră, Thủ tướng chính phủ Phạm Minh Chính mpơl nău ŭch geh du ntŭk kan đăp mpăn, rnă njrăng, đăp mpăn n’hanh tâm kơl gay ma rgum njrăng rdâng nuh srê, ndâk nsơm tay n’hanh geh hun hao tay têh dăng, hao jêng tâm ntŭk. Yơn lah ta nău ngăn geh saơ ăp nău tât ndal jêr njrăng, geh nău tât mô ueh ta nkual. Thủ tướng Phạm Minh Chính lĕ dăn đă ASEAN an geh nău mĭn dơn ngoăy ta năp nău ta nkual n’hanh lam ntur neh, rnê ăp dak kan ndrel, đah nău dơn kan, rdâk njêng, tâm ryơk pháp luật lam ntur neh, mô khuch tât nău ueh lăng, đăp mpăn tâm kơl n’hanh hun hao ta nkual, tâm ryơk nău kan bâh ASEAN n’hanh tât ôp mbơh nău tŏng ăp đah ASEAN bâh ăp ntrong kan tâm kơl, rơh tâm mâp yor ASEAN njêng n’hanh leo kan, ASEAN mât nău kan ƀư ndranh.

Nuĭh rblang: Y Sưng Phê Ja