VOV4.Mnông-  Thủ tướng Chính phủ Phạm Minh Chính lĕ tât râng rơh rƀŭn nchră gâl têh Đông Á (EAS) tal 16, ndrel đah nuĭh leo kan ăp dak ASEAN n’hanh ăp dak kan ndrel geh Trung Quốc, Nhật Bản, Hàn Quốc, Australia, New Zealand, Ấn Độ, Nga, Hoa Kỳ n’hanh Tổng thư ký ASEAN.

Ntoh ngơi ta rơh rƀŭn nchră, Thủ tướng Phạm Minh Chính lah na nê̆ EAS an geh n’hao tay nău kan n’hanh nău khlăy ntrong kan ntrôl pah kan an kloh rjăp, tâm nchră sŏng dăng, njêng nău knơm, tâm kơl ƀư ueh ăp nău kan êng, n’hao tâm mbơh nău kan dơn kan tâm rgop mât ueh nău đăp mpăn, ueh lăng, tâm kơl ndrel hun hao ta nkual n’hanh lam ntur neh. Thủ tướng dăn đă ăp dak kan geh nsum ti mât uănh ăp nău rgâl mhe tâm di, săk rnglăy, geh mbơh nău tâm kơl âk ding, tâm ban nău kơl an, tâm rgop pah kan gay ma tâm rdâng săk rnglăy đah ăp nău ntul rlong dôl ntoh hao, njrăng nău tât uh ah n’hanh ntrôl an hun hao, ndâk nsơm nâp nâl, ngăn lah mpeh nău wăng sa- rêh jêng lôch nuh srê.

Nuĭh rblang: Thị Đoắt