Tâm mir hvi rlău 1 hec-ta bah wa Lê Văn Việt, ta xã Ea Yông, nkuâl Krông Pắc, n’gor Dak Lak, ăp tơm sầu riêng rlău 6 năm dôl tâm rnôk dang kao. Wa Việt an gĭt, trôk nar tât djơh ndal ntop đah ăp nar nđik ntoch jong, nkre đah ăp rơh mih wai ƀư kao nhop huănh, rnoh kơn play đêt rđĭl đah ndrel khay dja năm e nơh. Yơn lah, wa Việt nha nsing nơm tâm săk uĕh bah mir tơm đŏng yor rnăk mât chăm tĭng trong sinh học, kơl play hao têh đăp mpăn:

“Đah du trong  mât chăm jŏ jong kơt gâp dôl ƀư, mô dŏng dak si hao têh ngăch, mô dŏng phân poh hoá học ri trôk nar dja, rnoh geh play mô âk yơn rgâl tay ăp sầu riêng săk kah rlău ăp trong ƀư mât chăm êng ƀa ƀă n’hanh păng mô geh ăp play dĭn tep, nsiăp play sầu riêng. Nê lah trong mât chăm jŏ jong mbra đêt geh khuch tât bah trôk nar khuch djơh”.

Mât chăm jŏ jong đêt dŏng dak si lah trong rƀŏng tuch tăm dơi âk rnăk tăm sầu riêng ta ăp nkuâl: Krông Pắc, Cư M’gar, Krông Năng… bah n’gor Dak Lak dŏng tâm ăp năm mhe aơ. Kônh wa tâm rgop kan nsum tâm ăp rmôt tâm boh, hợp tác xã mô lah tâm rgop kan nsum đah doanh nghiệp tăch n’gluh jêng geh ndơ ma tâm nđŭr, kơi năp nti, rêng mât chăm sầu riêng nâp dăng nar lơn ma wat jêh. Wa Lê Văn Thông, nuĭh kan tâm rmôt tâm boh tuch tăm srăch uĕh Hoà Thắng, n’gor Dak Lak nkoch:

“Kơt nti dơi khoa học bah ăp kỹ sư, khân păng sĭt trêng nti tay khoa học kỹ thuật, nău tă ơm gĭt kan bah ƀon lan kan lŏ mir bah nkual dja tât nkual êng ƀa ƀă gay he kơt nti. Tâl bar, an ƀon lan gĭt nchih tay gay he tĭng groi nđôi nău poh phân, mât chăm ăp nar”.

Bah năp nău đă ƀư lhăt bah Tổng cục Hải quan Trung Quốc mpeh ăp rnoh di đăp mpăn, n’gor Dak Lak hŏ nsrôih ra uănh tay, ntop kơl pă an mã mbrô nkual tăm n’hanh mã mbrô ntŭk nklâm tâl an ăp ntŭk ƀư tŏng di rnoh uĕh. Tât aƀaơ, lam n’gor geh 68 mã mbrô nkual tăm n’hanh 23 ntŭk nklâm tâl sầu riêng dơi uănh an tăch n’gluh tât Trung Quốc. Ta ăp nkual tăm sầu riêng rgum tơm, nău mât dŏng mã mbrô nkual tăm n’hanh ƀoi luh ntŭk tăm dơi ăp nkuâl tĭng ƀư lhăt jăp. Wa Trần Quốc Vĩnh, Kruanh UBND nkuâl Krông Pắc, nkuâl “tơm me sầu riêng” bah Dak Lak an gĭt, nkuâl hŏ dơi pă an 37 mã mbrô nkual tăm n’hanh 13 ntŭk nklâm tâl n’hanh dôl n’hao âk groi nđôi:

“Mpôl hên n’hao dăng mât uănh groi nđôi mã nkual tăm ndrel đah mã ntŭk nklâm tâl gay  mhâm ƀư đăp mpăn dơi ăp rnoh uĕh di. Lor bôk năp lah ăp doanh nghiệp ta nkuâl ân ƀư wat jêh ăp siƀŭt, lơn lah ăp dak si aƀaơ Trung Quốc dôl mpăng kơt dak si Cadimi mô lah dak Vàng O”

Tĭng wa Nguyễn Văn Hà, Groi Giám đốc Sở Nông nghiệp n’hanh Môi trường n’gor Dak Lak, năm aơ, n’gor n’gul rnoh tât geh tăch n’gluh 1,8 rmen USD, tâm nê sầu riêng mblâm n’hanh kât nđik lah ndơ tăch khlay. yơn lah, ăp nău tât rgoh n’gơ ntŭk tăch rgâl bôk năm hŏ ƀư n’gâng kan tuch tăm ân rgâl mhe tay, n’hao săk kah ndơ geh ƀư gay mât ntŭk tăch n’gluh.

“Bôk năp lah mpeh rêng ƀư, năl dơi nkual tăm n’hanh nkual tăm geh sơch n’hanh bar lah mpeh nău kan mât chăm ri ân đăp mpăn an nău ƀoi tĭng tơm luh, ntuh kơl ăp rgâl mhe khoa học kỹ thuật tâm ban kơt mât uănh mpeh ăp ndơ tơm lăp. Lơn lah rgum rvăt, mât prăp, nkret njêng dơi đăp mpăn srăch uĕh ndơ sa, ân jêng ăp nkual hŏ dơi dăp rgum gay ăp doanh nghiệp geh ndơ ma rdâk njêng ăp ntŭk tâl prăp, ăp nkual kât nđik gay đăp mpăn tĭng ăp rnoh uĕh di bah ăp dak rvăt n’glăp”.

Bol sầu riêng Dak Lak hŏ năl dơi lĕ mpeh rnoh têh hvi n’hanh săk kah, yơn gay tŏng di ăp rnoh kah uĕh khăch khoch, ân nsrôih rgâl tay âk đŏng. Nău lor nchrăp mât chăm đăp mpăn lah nău nsrôih bôk năp bah n’gor, jâng nsing gay sầu riêng Dak Lak nsan hao tay lot ngai tât ntŭk tăch rgâl săk geh êng ƀa ƀă.

Hương Lý