Nar 20/10, UBND n’gor Dak Lak ƀư rƀŭn nchră n’gul gâl 5 năm ƀư tĭng Nghị định 98/2018 bah Chính phủ mpeh nău kơl ntrŭt hun hao hợp tác xã, boăt nthoi nkra njêng, tăch ndơ lŏ mir n’hanh boăt nthoi tăch ndơ lŏ mir ta lam n’gor. Tĭng nău mbơh ta rƀŭn nchră, tĭng nkô̆ nău Nghị định 98 năm 2018 bah chính phủ, n’gor Dak Lak lĕ rgŏ jă ngăch, mĭn ƀư mhe, săk rnglăy n’hêl na nê̆, kơl âk doanh nghiệp, HTX n’hanh n’hanh ƀon lan geh tay dơi hun hao nkra njêng, n’hao nău geh.

Lam n’gor aƀaơ geh 150 HTX lŏ mir, rlău 270 ntŭk mât rong n’hanh rlău 15.500 rnăk geh tâm rgop nkra njêng n’hanh tăch ndơ đah doanh nghiệp. Nău râng ntrong kan tâm rgop nsĭt tay âk nău geh an ăp ding râng. Ăp doanh nghiệp, HTX dơi geh ntŭk pă ndơ đăp mpăn, uĕh kah; mkra ntŭk tăch ndơ an nuĭh ƀon lan tă bah ăp tâm ton tâm rgop, nta nău kan an nuĭh ƀon lan. Ndrel đah nĕ, nău boăt nthoi nta an ăp ndơ kloh uĕh, đăp mpăn, ăp tu tơm kloh na nê̆ an nuĭh ƀon lan dŏng, nta an nău kan an nuĭh pah kan. Nău kơt dŏng ăp kỹ thuật mhe tâm nkra njêng lŏ mir kơl n’hŭch khuch nău mô uĕh tât ntŭk ntô gŭ âm.