Ôi nđaơ (30/5), ta Ngih sam ƀŭt tiểu học Chu Văn An, xă Cuôr Đăng, nkuăl Cư M’gar, N’gâng kan ntĭm nti n’gor Dak Lak ƀư   “Rgŏ jă ntĭm re njrăng n’gang rmok dak an kon se, kon hŏk tâm rơh rlu nti 2024”. Ƀư rgŏ jă lah nău bôk năp tâm trôm ăp nău ƀư nkoch trêng, ntĭm nti, n’hao nău wât njrăng n’gang rmanh rmok dak an kon se, kon hŏk ta Dak Lak năm aơ.

Bah bôk năm tât aƀaơ, lam n’gor lĕ geh 25 kon hŏk khĭt yor rmok dak. Gay n’hŭch nău aơ, nău kan ntĭm nti tâm rgop đah ăp ntŭk kan geh tât ƀư rĭng, dŭt n’hâm, săk rnglăy ăp trong mkra mpeh njrăng n’gang rmok dak. N’gâng kan ntĭm nti Dak Lak đă ăp ntŭk kan ngih sam ƀŭt n’hao nkoch trêng, mbơh rblang nău wât, nău blău njrăng n’gang rmok dak tât kon hŏk, ngăn lah tâm ăp nar rlu nti. Ntrôl dăng ntrong leo ntĭm re đăp mpăn an kon hŏk tâm ngih sam ƀŭt, ƀa ƀơ ƀư ăp jrô ntĭm re dak an kon se.