Đắk Lắk dôl lăp ta khay duh phang, nchroh mbra geh nău duh phang ta âk ntŭk. N’gâng kan tuch tăm n’hanh ăp ntŭk ta n’gor dôl nsrôih mbơh tơih âk ăp trong leo kan nchrăp rnoh dak tŏ djrah gay ma mât đăp mpăn tuch tăm. Lam n’gor Đăk Lăk geh rlău 850 nău kan ƀư dak bât tŏ djrah đah bơi tât 620 dak bât ngâr dak, rlău 160 ntŭk bât dak n’hanh 78 ntŭk bơm. Kơp tât dŭt khay mih năm 2024, âk dak bât ta ăp nkuăl MDrăk , Ea Kar, Lăk, Ea H’Leo kanŭng geh rgum dak geh 50% tât 80% rnoh dak. Ăp dak bât êng tâm n’gor, rnoh dak lĕ ntơm đê̆ lơn bâh 10 tât 15% đah khay aơ năm 2024. Tĭng wa Nguyễn Văn Hà, Groi Giám đốc ntŭk kan tuch tăm mât rong n’hanh hun hao ƀon lan Đăk Lăk, nău lĕ ma dak me dak nglău n’hanh dak bât bâh n’gor lĕ soăt ơm, dôl lah nău ntêt nkri đah nău pah kan tuch tăm. Ntuk kan ta n’gor lĕ đă ăp ntuk dôl leo kan mbơh tơih ăp trong kan tâm rdâng, mbơh njrăng lor đah ăp ntŭk an geh ƀư tĭng na nê̆ nău dŏng dak, pă an tâm di gay ma mât đăp mpăn rnoh dak tŏ. Đah tơm tăm công nghiệp jŏ năm dôl ntrŭt đă ăp trong kan tŏ dak ntruh, geh tŏ mât njrăng an ueh.