Ta mir tao têh 17 ha ta xă Ea Sô, nkuăl Ea Kar (Dak Lak), wa Võ Quốc Dị ndrel âk phung pah kan mô ru sreh tao. Wa nkoch, tĭng đah tơm tao rlău 20 năm, rnăk wâl geh prăk đăp mpăn. Êng 4 năm plơ̆ ma aơ, du năm rnăk wâl geh prăk rlău 1 rmen. Ndơ geh aơ du gâl knơm tâm nău kơl rwăt khlay đăp mpăn bah ngih măy tao sĭk, ndrel đah nău kơt dŏng ăp trong ƀư mhe an tăm tao. Wa Võ Quốc Dị an gĭt:

Ngih gâp aƀaơ dŭt âk dŏng ntil tao mhe K3 lah khlay. Trong toh djrah bah rnăk wâl gâp dŏng béc toh da dê, pơk đah điện, ndrel đah măy n’gôr nchrăp lor. Ăp tơ̆ sreh tao tơm mô lah tăm mhe, mpôl hên bư bôk béc mhe tŏ dâl bôk yan, jŏ tâm 3-4 khay bôk năm. Jêh nĕ rnôk tao chăt, rnăk wâl cheh phân, dŭt âk lah NPK n’hanh rlŭk tay Urê, kơl an tơm hun hao ngăch gay tao hun hao prêh nkot.

Tĭng đong đah tao bah rlău 20 năm, wa Tô Bá Hồng, ta xă Ea Sô, nkuăl Ea Kar, an gĭt:

Băng: Gâp geh 5 ha tao, ngih măy ntop kơl âk prăk kơt prăk tŏ du yan 3 rkeh prăk/ha, sre 2 rkeh prăk/ha; jêh nĕ phân poh ri tĭng mir tao jay gâp âk mô lah đêt dơi ngih măy ntuh kơl. Ntĭt nsa, 1 ha 1 tấn phân, tĭng he sŏk đŏng. Tơm tăm âk năm aơ khlay đăp mpăn, an geh âk. Kơt năm năm aơ, jay gâp 1 ha geh 70-80 tấn, khlay 1,1-13 rkeh prăk/tấn, nkŭp prăk dŏng geh 8 rkeh prăk/ha.

Xă Ea Sô geh rlău 1.000 ha tao. Wa Nguyễn Xuân Hữu, kruanh UBND xă, an lah bôl săk rnglăy wăng sa bah tơm tao mô hŏ dơi nkôp đah ăp ntil tơm tăm sa play kơt sầu riêng, vải, nhãn mô lah tơm jŏ năm kơt cà phê, tiu, yơn aơ lah tơm tăm khlay ta nkual neh lŭ chreh, kơl âk rnăk rklaih luh ach o n’hanh geh nău rêh sâm geh.

Ƀon lan ƀa ƀơ tâm rgâl đah ăp ngih măy sĭk, uănh lah bah kơi yan bah tĭng ntil n’hanh ngih măy n’hanh dôl kơt dŏng âk ntil geh săk rnglăy ntop kơl kônh wa ƀon lan. Jêh nĕ nău phân poh, dak si tơm tăm an tâm di, ri mpôl hên saơ ngih măy sĭk ƀa ƀơ uănh nđôi, sŏk ntil ndơ gay uănh nđôi ntop kơl hun hao tơm tao gay kơt dŏng khoa học kỹ thuật gay mât chăm tơm tao m’hâm ƀư an săk geh.

Tĭng n’gor Dak Lak aƀaơ geh 15.000 ha tao tăm, dŭt âk rgum ta ăp nkuăl Buôn Đôn,. Ea Súp, Eqa Kar n’hanh M’Drắk. Rnoh geh tao ăp năm geh rkeh tấn.

Wa Lê Tuân- Groi Tổng Giám đốc Công ty CP Tao Sĭk 333 Dak Lak an gĭt, doanh nghiệp tâm rgop đah 2.100 rnăk ta ăp nkuăl Ea Kar n’hanh M’Drắk, tăm 8.200 ha tao, đah rnoh geh nklăp 750.000 tấn tao rih du năm. Công ty nchrăp lor tâm rgop đah ƀon lan n’hanh n’gâng kan ƀon lan mbơh ƀư ăp trong mkra gay tăm nâp nâl:

Ngih măy dôl rgâl nău nkret njêng jru hvi n’hao tay tăm tao, mât uănh nđôi đă ăp ndơ êng bah kơi sĭk ndơ̆ an ngih măy uĕh ngăn. Nkre, dŏng dŭt n’hâm ăp ndơ bah kơi sĭk gay dơi n’hŭch rnoh khlay ndơ kơt nkra njêng phân vi sinh, hôm nja tao tăch an ăp ntŭk mât rong, mô lah trong mhe aƀaơ nkra njêng điện su bah nja tao ma âk ngih măy lĕ ƀư. Mpôl hên dôl uănh lor ndơ̆ an tăm âk ăp ntil tao uĕh lơn, gay n’hao săk geh tao n’hanh ntêm nkrem sĭk tâm tao ta du ntŭk kan rnoh neh.

Đah nău nchrăp lor tâm rgop rjăp đah nuĭh ƀon lan ndrel doanh nghiệp n’hanh n’gâng kan ƀon lan, nău kan tao sĭk Dak Lak dôl hun hao nâp nâl, nsĭt tay nău geh đăp mpăn an ăp ding n’hanh rgop tâm jâng wăng sa ta ntŭk.