N’glău dak bât Ia Mơr geh lĕ rngôch tơm prăk ntuh kơl bơi 3.000 rmen prăk, rnoh âk n’gâr bơi 180 rkeh m3, dơi weh ƀư gay pă an tơm dak tŏ an nklăp 12.500ha neh tuch tăm n’hanh dak dŏng rêh an nklăp 50.000 nuĭh ta 2 n’gor Gia Lai n’hanh Dak Lak.

Xã n’har bri Ia Rvê, n’gor Dak Lak hŏ ra uănh tay nklăp 1.100 ha ta ăp thôn 6, 7, 8, 9 n’hanh 11 gay dăn đă pơk hvi nkual tŏ rơh 2 bah trong nchrăp ƀư dak bât n’gâr dak Ia Mơr. Lôch hăn ôp uănh ngăn ngăn, wa Lương Nguyễn Minh Triết, Bí thư Tỉnh ủy Dak Lak lah rjăp, ntuh kơl ndơ dŏng dak bât ta nkual n’har bri geh nkô̆ khlay tâm hun hao tuch tăm, n’hŭch ach o jŏ jong, đăp mpăn ƀon lan gŭ n’hanh rdâk nâp tay njrăng n’gang neh dak, rnă njrăng. Jêng, ăp n’gâng kan geh tât ân kan nsum đah nhih pah kan Trung ương rdâk njêng trong nchrăp ntuh kơl n’hong dak lŏ an 1.100 ha hŏ ra uănh, đăp mpăn mbơh kloh, mô geh tâm chong cheng đah ăp ntŭk nchrăp kan êng ƀa ƀă. Mpeh jŏ jong, dăp rgum dak bât ân mĭn tât nău ŭch geh bah lĕ 12 thôn tâm xã.