Gay rdêl bah nuh srê lhut mbung plôk nchop ntoh ta ndrôk, rpu ta 2 xã: Xốp n’hanh Đăk Nhoong, nkuâl Đăk Glei, Chi cục Mât rong n’hanh Thú y n’gor Kon Tum hŏ n’hao âk cán bộ, ndơ dŏng nking nchăng nuh srê ntưp rêng. Chi cục Mât rong n’hanh Thú y n’gor Kon Tum hŏ đă du Groi chi cục n’hanh 5 cán bộ kỹ thuật tât 2 xã: Xốp, Đăk Nhoong ntop kơl mpôl kan dơi kan nkuâl Đăk Glei rdâng lơh nuh srê, nkre ntĭm nti nuĭh ƀon lan mât chăm, săm ji an ndrôk, rpu geh nuh srê.

Ndrel đah nê Chi cục Mât rong n’hanh Thú y n’gor Kon Tum hŏ an nkuâl Đăk Glei rvai lor 300 lít dak si, 2.500 dĭng vắc xin ƀư chuh n’gang mpă lor, rdêl bah mô an nuh srê ntoh luh ta ăp thôn: Đăk Nhoong, Đăk Ung, xã Đăk Nhoong n’hanh thôn Xốp Nghét, xã Xốp ntưp rêng bah dih. Wa Ưng Văn Thanh, Kruanh Chi cục Mât rong n’hanh Thú Y n’gor Kon Tum an gĭt: Rnoh ndrôk rpu ntưp ji nchih mbơh ntĭm nti tay kônh wa mât săm tay. N’gâng kan ta ntŭk nchih mpăng nkual geh nuh srê kônh wa mô dơi tăch rgâl, nchuăn rdeng ndrôk, rpu luh lăp tâm nkual nuh srê. Geh mbro tâm du  pơh ăp nar puh nkhĭt kaman du tơ̆ tâm nkual nuh srê.