Bol geh tât khuch jêr jŏt nsum bah wăng sa lam ntŭr neh, năm 2024 nsĭt geh tăch n’gluh bah n’gor Lâm Đồng nha hôm hun hao 6,1% rđĭl đah năm 2023. Tâm nê, ăp ntil biăp, play n’hanh ăp ntil lah ntŭk chrat ang tay. Gay geh nău dơi  dja, rlău ma pơk hvi tâm nkrêp kan nsum, n’hao săk kah ndơ geh ƀư, nău rdâk njêng săk ntơ lư, nkơnh n’hơ săk ntơ lư n’gor Lâm Đồng uănh khlay tĭng ƀư đŏng.

Năm 2024 lah năm ntơm hun hao đăt ndal tâm nău kan tuch tăm - tăch rgâl bah nô K’Hoàng, rnoi nuĭh K’ho ta thôn Phú Bình, xã Phú Hội, nkuâl Đức Trọng, n’gor Lâm Đồng. Ntơm njêng nău kan 1.000m2 jay bil tâm năm 2017, tât năm 2024 nô hŏ pơk hvi nău kan tuch tăm rlău 7.000m2. Ăp ndơ tuch tăm nô ƀư luh hŏ dơi tăch n’gluh tât ăp dak lam ntŭr neh. K’Hoàng an gĭt, rlău ma săk geh n’hanh kah uĕh ndơ tuch tăm ân di rnoh, nău tuch tăm tĭng nău dăn rvăt, nsing nơm tâm nkrêp kan nsum tuch tăm tăch rgâl mơ lah rnăng mpông pơk khlay gay geh nău dơi.

“Gay njêng luh dơi rnoh khlay ndơ tuch tăm ri he ân mât kan dơi 4 rêng kan dŭt khlay, nê lah ntŭk tăch luh, rnoh khlay an siƀŭt dăn rvăt bah he; geh trong nchrăp tuch tăm; mât dơi rêng kan bôk trong lăp bah he lah phân dak si mât njrăng si tăm ntŭk tuch tăm; n’hanh mât dơi roh huach prăk dŏng kan tuch tăm. Tuch tăm tĭng siƀŭt ton dăn rvăt ri he mô hôm rvê mpeh nău ndơ tuch tăm jŭr geh rnoh khlay hŭch thuk, nău rgâl mpeh rnoh khlay bah ntŭk tăch rgâl păng mhâm jêng, ta aơ he djăt ma rvê tuch tăm dơm, đăp mpăn săk kah gay jao ndơ geh ƀư an năch dơm”.

Tâm ban kơt nô K’Hoàng năm 2024, hang rhiăng ƀon lan tăm kao ta nkual ƀon têh Đà Lạt, n’gor Lâm Đồng n’gluh kao si bah he tăch n’gluh nơm geh tâm nkrêp kan nsum đah ăp doanh nghiệp têh. Tĭng wa Huỳnh Đình Phước, ta phường 8, nkual ƀon têh Đà Lạt, aƀaơ, rnoh khlay tăch kao, rnoh di săk uĕh, mông nar jao ndơ tăch, mông nar ndơ̆ prăk rvăt… hŏ dŭt kloh rvah, mô hôm dah rŏng nuĭh dăn rvăt nchŏng lah kơt ntơm nơh đŏng ôh. Yor kơt nê̆, nuĭh tăm kao geh tơm wăng sa âk n’hanh đăp mpăn lơn, lor nchrăp n’hanh way blău lơn tâm nău kan tuch tăm. Wa Huỳnh Đình Phước an gĭt:

   “Ntơm nơh gâp ƀư n’hanh tăch bah dih jêng nsĭt geh wăng sa mô đăp mpăn, yor rnoh khlay păng rgoh n’hơ. Hôm ăp công ty ri saơ rnoh khlay trong tăch luh păng đăp mpăn jêng gâp saơ tâm nkrêp kan nsum đah khân păng ri nsĭt geh, yor du gâl kan nsum đah công ty ri khân păng hŏ ơm geh ntŭk tăch jêng he djăt ma jao ndơ tăch dơm, hôm nău kan ƀa ƀă lah an he nsĭt geh âk lơn rđĭl đah ƀư êng tăch êng bah dih”.

    Tĭng wa Trương Thị Minh Tuyết, mât uănh nău kan tâm boh tuch tăm đah Công ty Dalat Hasfarm, doanh nghiệp geh tâm nkrêp tăm kao têh hvi dâk bôk năp nkual ƀon têh Đà Lạt, gay tâm nkrêp kan nsum đah nuĭh tăm kao jŏ jong, doanh nghiệp hŏ njêng prăk nkrem ntop kơl ƀon lan đah rnoh prăk tât bar pe jât rmen prăk. Nuĭh ŭch geh tơm prăk mbra dơi ntop kơl ntơm bah 100 tât 150 rkeh prăk/tơ̆ tăm kao ma mô kâp trok deh prăk kon:

     “Gay nău tâm boh đah ƀon lan kan lŏ mir dơi uĕh lơn ri mpeh công ty hŏ geh du đêt nău kan ntop kơl  đŏng. Rlău ma ntop kơl tơm prăk, tơm si ntil tă bah công ty ndơ̆ an ƀon  lan tuch tăm ri he ân sơch ăp ntil tơm uĕh jêng, tŏng di rnoh an tăch n’gluh đŏng. Công ty hŏ n’gluh dŭt âk rnoh di an tĭng ntil kao gay ăp rnăk ƀon lan uănh sơch, gĭt lah rnôk tăm ri mbra tĭng jăp mhâm ƀư mơ di rnoh n’glăp tâm công ty. Aƀaơ, rnoh âk tăch n’gluh bah ndơ tâm boh hŏ nar lơn ma âk, lơn lah kao cẩm chướng”

     Rlău ma nkô̆ nău tâm nkrêp kan nsum, n’hao săk uĕh ndơ geh ƀư, nău rdâk njêng săk ntơ lư n’hanh ntik n’hao rnoh khlay săk ntơ lư lah trong nkra khlay ntrŭt ntrôl tuch tăm n’hanh tăch n’gluh ăp ntil ndơ tuch tăm bah n’gor Lâm Đồng.

Tĭng wa Phạm S, Groi kuanh UBND n’gor Lâm Đồng, săk ntơ “Đà Lạt – rsang rnglăy luh bah bri uĕh neh ndrŏng” dơi Cục Sở hữu trí tuệ ntăm an bằng tâm năm 2017, đah 4 ntil ndơ geh êng ta nkual ƀon têh Đà Lạt n’hanh ăp nkuâl kiău ma, lah: biăp, kao, cà phê arabica n’hah pâl nđaih tuch tăm. Aƀaơ hŏ geh 768 mpôl kan, ăp nuĭh dơi pă an nău dơi dŏng săk ntơ lư, tâm nê lơn âk lah kao rlău 82%. Năm 2024, lĕ rngôch nsĭt geh tăch n’gluh bah n’gor Lâm Đồng geh 986 rkeh USD, hao 6,1% rđĭl đah ndrel khay dja năm e nơh, tâm nê geh âk tuch tăm tăch n’gluh ndjôt săk ntơ “Đà Lạt – Rsang rnglay luh bah bri uĕh neh ndrŏng”.

Aƀaơ Lâm Đồng dôl pơk hvi tay nuĭh dŏng săk ntơ lư an ndơ geh ƀư tuch tăm êng ƀa ƀă bah nkual ƀon têh, bah nê nta trong dơh n’hao nău dơi tâm rlong ta ntŭk tăch rgâl tâm dak n’hanh tăch n’gluh. Wa Phạm S, an gĭt:

“N’gor n’glêh an pơk hvi du đêt ndơ geh ƀư, ăp ndơ dja mbra râng dŏng săk ntơ lư ndrel đah 4 ntil ndơ geh ƀư tơm khlay bôk năp. Geh kơt nê mơ joi geh rnoh khlay mha êng bah Đà Lạt tâm ban kơt n’hao dơi ntŭk têh khlay tuch tăm, ntrŭt nsôr dơi ăp bôk nkô̆, lơn lah nuĭh ƀon lan kan lŏ mir, nuĭh tơm tuch tăm dĭ hvi dŏng tay tuch tăm công nghệ mhe, tuch tăm wăch plơ̆ tay gay mât dŏng rnoh khlay, săk geh bah nkual ƀon têh Đà Lạt n’hanh nkual kiău ma”.

Lăp tâm năm mhe 2025, năm ntơm rơh hun hao bah rnoi nuĭh, n’gor Lâm Đồng ntrôl dăng tay dăp rgum nău kan tuch tăm, uănh khlay rgâl mbrô tâm nău  kan tuch tăm, rƀŏng tât jêng tuch tăm pet lât, têh blău mhe n’hanh jŏ jong; lah ntŭk rgum gŭ mĭn, tuch tăm pet lât têh gưl neh dak n’hanh dak  bah dih; ndơ̆ ndơ tuch tăm bah n’gor râng jru tâm rêng rnoh khlay lam ntŭr neh, tâm nê, ăp ndơ geh ƀư ndjôt săk ntơ lư ‘Đà Lạt – Srang rnglay bah bri uĕh neh ndrŏng lah n’gâng kan khlay, geh nău dơi tâm rlong ta ntŭk tăch rgâl tâm dak n’hanh tăch n’gluh./.