Uănh nđôi nău pah kan ta ntŭk rlong ƀư, âk nuĭh ƀon lan kan lŏ mir, cán bộ khuyến nông ăp n’gor Tây Nguyên dŭt ŭch đah ntrong kan mât uănh mir tơm tĭng trong lĕ rngôch. bâh nău mât uănh ndơ kah, dak tŏ tât njrăng bu tuh lĕ geh ƀư tâm ban, geh nău kơl ăp ntil máy mok ueh mhe, công nghệ rnoh mbrô n’hanh nău kan mbơh nchroh mih sial trôk nar. Wa Nguyễn Văn một, ƀon lan kan lŏ mir tăm sầu riêng ta xã Quảng Phú, n’gor Đăk Lăk an gĭt, nău ƀư an wa ŭch ngăn lah nău kan mô geh mbơh tơih kĩ thuật êng ma rdâk njêng lĕ ma njăr kan. ƀon an kan lŏ mir mbra dơi geh saơ săk rnglăy pah kan ta mir gay ma kơt nti dŏng tâm nău ngăn.“Bar pe năm hôm gâp geh ƀư play ueh ngăn, bu rvăt mô geh mưch ngăn, dak si lah gâp mât poh tĭng rơh. Gâp hăn nti kơt ƀư tay âk nău kan gay ma dơi ƀư ueh lơn. Saơ kơt nĕ lah rhơn ngăn, gâp geh tay âk nău tă blău kan gay ma ƀư”.

Tâm rnôk nău kan tăm sầu riêng n’hanh cà phê Tây Nguyên dôl geh tâm rdâng đah âk nău ntul rlong kơt lah trôk nar mih sial mô ueh, nău bu tuh âk n’hanh ăp nău jêr bâh ntŭk tăch rvăt đah dak bah dih, nău rdâk njêng ăp nău kan ngăn ndrel đah rgâl mhe kĩ thuật dơi geh uănh lah trong hăn dŭt khlăy ngăn.

Tiến sĩ Phan Việt Hà, groi viện trưởng  mât Viện Nông lâm nghiệp Tây Nguyên an gĭt, nău kan geh ƀư tĭng trong ueh mhe lĕ rngôch njăr trong ndơn yor kanŭng rgum ta ăp nău kan êng. Nău tơm khlăy ngăn lah mât nâp jêng tơm tăm, dŏng si gle dak nor an geh săk rnglăy, mât nău ueh bâh neh, mât njrăng rnoh geh ndơ tăm n’hanh dŏng công nghệ mhe tâm nău mât uănh pah kan tuch tăm.

Nkô̆ ŭch nglâ̆ dŭt mô dơn lah n’hao nău geh ma hôm nha kơl an ƀon lan n’huch prăk kan, n’hao nău dơi tâm rdâng đah mih sial trôk nar n’hanh tâm di đah ăp nău mpŏng pah kan tăch an dak bah dih lơ ma jêr. Tĭng nău mbơh bâh Tiến sĩ Phan Việt Hà, aơ lah ăp nău khlăy ngăn gay ma ntrŭnh mbơh n’gâng kan sầu riêng n’hanh cà phê hun hao nâp nâl tâm let năp tay. “Ăp ntŭk tăm ma mpôl hên lĕ geh dŏng dŭt âk nău mhe kĩ thuật. Mpôl hên lĕ geh du ntrong kan ntĭm leo pah kan tăm sầu riêng nâp nâl. Aơ lah nău kan ma hên dut ŭch tâm rgop ƀư 4 ntŭk kan ndrel. Tâm nău kan aơ, mpôl hên ŭch njêng tâm rgop lĕ rngôch ăp ntrong kan khoa học kĩ thuật bâh ăp dak kan ndrel êng êng”.

Du nău dŭt mât uănh bâh ntrong kan lah nău tât râng bâh âk ding, bâh ntŭk kan mât uănh ngih dak, ntŭk kan mĭn uănh khoa học tât ntrong kan ntrŭt đă pah kan tuch tăm n’hanh ăp ntŭk leo ƀư pah kan jan sa. nău tâm rgop kan aơ geh knơm mbra rhoăt gleh nău tâm ƀah bâh mĭn uănh tât nău kan ngăn.

Wa Lê Quốc Thanh, Giám đốc ntŭk kan Khuyến nông ngih dak uănh năl, du nău kan bol ma ueh kanŭng geh nău khlăy ngăn rnôk geh mbơh tơih têh hvi n’hanh geh ƀon lan kan lŏ mir kơt ƀư, dŏng tâm nău pah kan tuch tăm ngăn.

Tĭng wa Thanh, ntrong kan ntĭm tuch tăm mbra geh kan lah ƀư ndranh đah nuĭh kan khoa học n’hanh nuĭh ƀon lan, kơl ăp nău mhe kĩ thuật geh trĕ lam ngăch lơn bâh ăp nău pah kan nti kan, mbơh tơih n’hanh ntĭm nti sŏng dăng ta ntŭk kan. Rnôk ma ăp ding ndrel tât râng tâm du nău tâm rgop na nê̆, ăp nău pah kan nâp nâl mơ geh rơh nkhêp pơk hvi nău kan nsĭt tay nău geh săk rnglăy na nê̆ an nuĭh pah kan. “Gay ma mât đăp mpăn lĕ rngôch ăp nău kan khlăy ngăn bâh ntŭk tăch rgâl rĭ tât ta aơ ƀon lan kan lŏ mir mbra dơi geh joi trong kan. Mpôl hên lĕ ŭch ƀon lan ndrel đah mpôl kan ntĭm nti tuch tăm mhâm ƀư gay ma mbơh tơih geh âk tay lơn ăp nău tă blău kan bâh ntrong kan mpôl hên lĕ mbơh tơih”.