Bâh ta ôi nar bôk năp lăp kan ndrel n’gor, nuĭh leo kan ăp ntŭk kan bâh n’gâng kan tuch tăm mât rong n’hanh môi trường n’gor Đăk Lắk (mhe) lĕ leo rơh rƀŭn nchră gay ma pă uănh rnoh nău kan hôm nha klen, an lor ƀư ueh ăp nău kan ndal, kơl tay nău pah kan, mât uănh ntŭk ntô gŭ âm lĕ geh mât uănh, mât đăp mpăn trong kan leo ƀư geh ƀư ueh aih, mô geh tăch proăt.

Wa Mai Vũ Quốc Bảo, Cán bộ chi cục mât uănh nău ueh ndơ tuch tăm, ndơ si gle, ndơ tui ka- ntơm nơh nău kan ta n’gor Phú Yên (ơm) nkloch.

 “Đah nău mĭn nchrăp ueh an nău pah kan. Nar bôk năp hăn pah kan ta ntŭk kan mhe, geh nău nchrăp kan ueh bâh ntŭk kan nta nău dơh nơih mpeh ntŭk gŭ, ntŭk sa, hăn nsong tâm ban kơt ntŭk pah kan, tât aƀaơ gâp mbra dơi ntơm lăp pah kan an tâm di tĭng nău ŭch bâh nuĭh leo kan ăp gâl tâm ban kơt nău way kan”.

Wa Đỗ Tuấn Hưng, Chi cục trưởng Chi cục mât uănh nău ueh ndơ tuch tăm, si đar, tui ka n’gor Đăk Lăk an gĭt, lôch nglăp nsum ntŭk kan dơn tay 8 cán bộ bâh Phú Yên hăn ta Đăk Lăk pah kan. Tât aƀaơ, ăp nuĭh kan lĕ đăp mpăn mpeh ntŭk gŭ ntŭk sa, nchrăp tŏng ăp ueh mpeh nău mĭn, mbra dơi geh pah kan jăp ta rơh mhe.

“Mpôl hên lĕ rƀŭn nchră gay ma mbơh tơih, pă nău kan na nê̆ tât ăp đồng chí sĭt ăp ntŭk kan mhe bâh ăp ntŭk kan ngăch gĭt dơn nău kan gay ma mât đăp mpăn ueh aih nău pah kan tâm 6 khay dŭt năm mô geh nkai”.

Wa Đặng Thị Thủy, Groi Giám đốc ntŭk kan tuch tăm mât rong n’hanh ntŭk gŭ dâm n’gor Đăk Lăk lah na nê̆, lĕ rngôch mbra geh tâm rgop na nê̆, ngăch ƀư lôch ueh nău leo kan, mât nău pah kan đăp mpăn n’hanh rgum ƀư tĭng ăp bôk nău kan, nău nchrăp kơl an hun hao wăng sa- rêh jêng bâh n’gor lôch lăp kan nsum.

“Mpôl hên lĕ nchrăp na nê̆ tâm rgop ta nău kan rdâk njêng trong kan hun hao bâh n’gâng kan tuch tăm, geh dŏng lĕ nău dơi geh mpeh âk nău ueh nău ơm geh gay ma ndŏ n’gâng kan tuch tăm n’hanh ntŭk gŭ dâm hun hao ueh nđir, nâp nâl an n’gor mhe. N’hanh aơ lah rơh dŭt khlăy gay ma njêng tay n’gâng kan tuch tăm- ntŭk gŭ rêh tĭng trong ueh mhe n’hanh ueh dăch đah ntŭk gŭ dâm.