Kêng măng (24/6), ta nkual ƀon têh Kon Tum, Sở Khoa học n’hanh Công nghệ n’gor Kon Tum ƀư Lễ ntăm an siƀŭt kơp dơn nău dơi dŏng mbơh gĭt ntŭk tăm “Ngọc Linh” ndơ geh ƀư sâm bum an 4 mpôl kan n’hanh êng nuĭh. Nê lah: Hợp tác xã Dược liệu Hoàng Hiểu Tu Mơ Rông ta xã Đăk Hà, nkuâl Tu Mơ Rông; Rmôt tâm boh tăm Sâm Ngọc Linh Đăk Xây ta xã Xốp, nkuâl Đăk Glei; rnăk wa A Sỹ, A Chung ta xã Tê Xăng n’hanh Măng Ri, nkuâl Tu Mơ Rông aƀaơ dôl tăm 5.800 tơm sâm Ngọc Linh bah 6 năm let lơ.

Wa Huỳnh Trung Kim, Groi Giám đốc Sở Khoa học n’hanh Công nghệ n’gor Kon Tum, an gĭt, tât aƀaơ đơn vị hŏ pă an siƀŭt kơp dơn nău dơi dŏng ntŭk tăm “Ngọc Linh” ndơ geh ƀư sâm bum an 13 mpôl n’hanh êng nuĭh. Lor rnôk pă an đơn vị kan nsum đah Sở Nông nghiệp n’hanh Môi trường, UBND ăp nkuâl n’hanh xã ƀư ôp uănh, năl rnoh âk, rnoh jŏ năm tĭng nkual tăm sâm gay dăn đă pă an siƀŭt mbơh gĭt ntŭk tăm. Nkre sŏk ntil uănh năl gĭt ADN rnôk lôch năl di ngăn lah sâm Ngọc Linh mơ dơi pă an siƀŭt mbơh gĭt ntŭk tăm “Ngọc Linh”.