Nkual yôk n’gor Khánh Hòa (kâng n’har n’gor Dak Lak n’hanh Lâm Đồng) dơi trôk neh an đah ntŭk ntô têh, âk dak leng ơm, dak diăng kloh nđik. Nsum mpôl ăp rnoi nuĭh Raglai, K’Ho T’rin, Ê đê... gŭ rêh jŏ năm ta aơ hôm mât ndrăy âk lễ hội way ơm, nău mprơ, ndơ sông sa kah n’hanh nău kan I ty. Aơ lah ăp ndơ khlay gay hun hao ăp ndơ pâl nđaih sinh thái, pâl nđaih nsum mpôl, pâl nđaih hât nuih ntĭt mpơl nkual prêh.

Năm bah năp, n’gor Khánh Hòa lĕ an âk nău ntrŭnh gay hun hao pâl nđaih nkual yôk. Du đêt ndơ bôk năp dơi jêng n’hanh wăch rgum năch kơt: tuor hao yôk Tà Giang, hăn joi tŭk ta nkô yôk Ba Cụm, dak leng Tà Gụ ta Khánh Sơn; Công viên pâl nđaih Yang Bay, nkual lŏ mir Hoa Quả Sơn ta Trung Khánh Vĩnh. Lơn lah play bung ntô pŭt, tơm tăm khlay ta nkual yôk mô knung kơl hang rbăn rnăk rklaih luh ach o ma hôm pơk luh trong hăn mhe rnôk tâm rgop ƀư pâl nđaih nsum mpôl. Wa Đoàn Văn Hưởng, Giám đốc Hợp tác xã Hiệu Linh, xă Nam Khánh Vĩnh (bah năp lah xă Khánh Thành), an gĭt: Hợp tác xã geh tât 90% nuĭh lah ƀon lan rnoi mpôl kơt Tày, Raglai, văn hóa ta ntŭk ma hôm kơl n’hao khlay ndơ lŏ mir, nta tay nău kan n’hanh hao nău geh an nuĭh ƀon.

Gâp ƀư pâl nđaih nsum mpôl dŭt âk lah gay mpla nsơ ndơ bah ƀon lan. Păch pâl nđaih tât mir ri lor lah dơi ƀư ngăn, sa play bung ta ntŭk, jêh nĕ dơi hăn mât chăm tơm play bung. Ta mir geh n’glău mât ka, lah năch ŭch ri dơi ƀư ngăn nhŭp ka. Lah nsum lah dŭt âk nău ƀư gay năch hăn nsong uănh n’hanh ƀư ngăn.

Cherry lah ntil play mhe ndơ̆ an tăm lôch dơi ta nkual neh yôk n’gor Khánh Hòa dŭt uĕh an năch pâl nđaih. Ăp rkum play têh, rgâl ntô chăng, ntô dŭm tât ônh, ndâp tâm n’ging n’ha pŭt, nchah tĭng sial n’gơ. Âk năch pâl nđaih rơh bôk năp lăp nkual mir lĕ an rlu jâng dŭt jŏ, ntôn kơt dôl dâk ta ntŭk bri nđik châu Âu.

Ndrel đah Cherry, ăp ntrong ƀư lŏ mir tâm rgop pâl nđaih đah ndơ ta ntŭk kơt mât bê, mât ka dak diăng, tăm tơm sa play dôl hun hao ta âk ntŭk ta nkual yôk Khánh Hòa. Ăp ntrong ƀư aơ mô joi trong ƀư têh ir, yơn an nsrôih gơih, ntuh kơl uĕh, ngăn lah tâm trong ƀư pâl nđaih. Wa Nguyễn Ngọc Sơn, Groi Giám đốc N’gâng kan Rnoi nuĭh n’hanh chroh rƀŭn n’gor Khánh Hòa an gĭt: gay ntrong ƀư aơ hun hao nâp nâl, an hăn ndrel đah nău ntĭm nti tâm di an ƀon lan rnoi mpôl đêt, tâm ndôp mât ndrăy ăp nău khlay văn hóa way ơm kơt lễ hội, mpât mprơ, nău kan I ty... Jêng nău uĕh êng an ăp măng tât, nkra hun hao wăng sa, nkre mât nău uĕh ơm nkual prêh.

Lah hun hao geh ăp ntrong ƀư pâl nđaih tơm si n’hanh ntŭk ntô gŭ âm, pâl nđaih nsum  mpôl hăn ndrel đah tăch ndơ lŏ mir bah nkual rnoi mpôl đêt ri mbra dŭt uĕh. Pơng mô knŭng kơl tăch ndơ ma hôm kơl kônh wa n’hao nău blău rêh-bah pah kan jan sa tât nău blău rêh jêng kon nuĭh, tâm mbơh ngơi, tâm nđŭr văn hóa. Khlay lơn lah kơl kônh wa rgâl nău mĭn, rgâl nău wât du trong uĕh lơn.

Bah ntŭk nău kan lŏ mir, ntrong ƀư lŏ mir tâm rgop pâl nđaih dôl pơk luh trong hăn mhe an nkual yôk Khánh Hòa, kơl n’hao nău geh n’hanh mât jâng pah kan ta ntŭk. Ăp ntŭk dôl tâm rgop đah nău kan dơi kan ndâk njêng ăp ntrong ƀư tuch tăm, mât rong tâm rgop pâl nđaih tơm si n’hanh ntŭk ntô gŭ âm; ƀư ăp jrô tiăr nti nău blău ƀư pâl nđaih, ntĭm mât chăm tơm tăm, mât ka, nkret njêng ndơ lŏ mir rhŏ an năch hăn uănh nsong.