Bah dŭt khay 6 tât aƀaơ, n’gor Gia Lai djôt dơn 14 ntŭk srê ji ndŭl sŭr châu Phi ta 14 xă, đă an tâp bôr 721 mlâm sŭr đah âk rlău 46 tấn. Ta Gia Lai, ăp ntŭk srê dơi saơ ta 29 rnăk mât rong ta 24 thôn, ƀon tâm 14 xă. Nkôp đah pơh bah năp, rnoh xă geh srê hao tay 6 ntŭk, tâm nĕ 5 ntŭk ta nkual bah lơ nâp nar Gia Lai n’hanh 1 xă ta Đông Gia Lai geh: Ia Til, Ia Krái, Ia Grai, Chư Sê, Ia Krêl, Tuy Phước.

Gay uănh nđôi srê, tâm rlău 1 khay bah năp, 4 ntŭk uănh nđôi srê ăp nău kan ta ăp trong quốc lộ têh bah n’gor Gia Lai lĕ uănh nđôi bơi 900 ndeh rdêng mpô mpa, ƀư puh rao lĕ rngôch ndeh luh lăp. N’gâng kan tuch tăm mât rong n’hanh ntŭk ntô gŭ âm n’gor Gia Lai ntĭm rđău ăp ntŭk groi nđôi srê, sŏk mham uănh năl, mkra rjăp gay rnôk geh ntŭk srê mhe, nkre nkoch trêng, bônh đă nuĭh ƀon lan nchră mbơh tơih n’hanh ƀư tĭng rjăp ăp trong njrăng n’gang srê.