Du doanh nghiệp tăch n’gluh ndơ lŏ mir têh ta Dak Lak, đah 2 ntil ndơ tơm khlay lah cà phê rlăy n’hanh tiêu, Công ty TNHH MTV Tổng công ty Simexco 2-9 Dak Lak geh nău ŭch prăk dŭt âk gay rwăt ndoh ndơ gay rhŏ dŏng nkret njêng, tăch n’gluh. Wa Nguyễn Tiến Dũng, Groi Tổng Giám đốc công ty, an gĭt doanh nghiệp aƀaơ geh nkah rnon đêt năm rlău 11.000 rmen prăk ta 18 ngân hàng. Tâm rnôk prăk dŏng bôk năp hao âk, nău ăp ngân hàng n’hŭch prăk kon an manh mbra kơl doanh nghiệp n’hŭch âk prăk kaih, geh tay nuih n’hâm ntuh kơl n’hanh n’hao soan tâm rlong. “Vietcombank lah ngân hàng lor bôk năp ƀư tĭng nău n'hŭch prăk kon tĭng ntĭm rđău bah Chính phủ. Đah rnoh manh 1.500 rmen prăk, rnoh n'hŭch prăk kon aƀaơ bah 1–1,5% kơl doanh nghiệp mpôl hên ntêm nkrem nklăp 1–1,5 rmen prăk ăp khay. Tă bah nĕ, n'hŭch prăk kon manh, geh tay tơm ndơ ntuh kơl hun hao doanh nghiệp".

 Mô knŭng doanh nghiệp tăch n'gluh ndơ lŏ mir têh hvi, ăp doanh nghiệp jê̆ n'hanh dah găp ta Dak Lak hôm nha dôl geh dơn nău geh bâh nău kơl n'huch rnoh prăk kon bâh Chính phủ. Wa Đặng Anh Dũng, Giám đốc du doanh nghiệp tăch rgâl ndoh ndơ, ndơ dŏng nkra ndeh ô tô ta phường Buôn Ma Thuột, an gĭt, doanh nghiệp aƀaơ nkah rnon đêt năm rlău 50 rmen prăk ta 3 ngân hàng. Tâm nĕ, rnoh prăk manh 15 rmen prăk ta Agribank Dak Lak lĕ ngăch geh n'huch rnoh prăk kon, bôk năp kơl doanh nghiệp n'huch rnoh prăk dŏng kan. "Gâp dôl manh prăk ta Agribank Dak Lak. Mhe aơ, ngân hàng lĕ nta trong dơh, ndơ̆ luh rnoh kơl an prăk kon an doanh nghiệp. Ngăn lah, ngân hàng ntop kơl n'hŭch prăk kon tât 1,5% tĭng nău ntrŭnh bah Chính phủ. Let năp tay, gâp mpŏng ăp ngân hàng êng ƀa ƀă mbơh ƀư nău kơl aơ đŏng, kơl doanh nghiệp n'hŭch prăk dŏng kan, geh tay nuih n'hâm hun hao nâp nâl".

 Ta Dak Lak, Agribank lah ngoăy tâm ăp ngân hàng ơm mbơh ƀư n'hŭch prăk kon tĭng nău rđău đă bah Chính phủ n'hanh Ngân hàng Ngih dak. Wa Võ Tiến Nam, Groi Giám đốc Agribank Dak Lak, an gĭt, jêh rnôk geh nău rđău đă, ntŭk kan lĕ kơp uănh ăp rnoh prăk manh, năl nuĭh dơi an rgâl prăk kon. Rơh n'hŭch prăk kon bôk năp dơi mbơh ƀư bah nar 25/10 mhe rlău.

"Đah ăp rnoh prăk manh jŏ jong aƀaơ geh rnoh prăk kon rlău 10%/năm n'hanh ăp rnoh prăk manh đêt năm lơn geh rnoh prăk kon rlău 11%/năm, lam chi nhánh lĕ tĭng ƀư n'hŭch rnoh prăk kon an rlău 28.000 rnoh prăk manh, đah dĭng lĕ rnoh prăk rlău 9.800 rmen prăk, dĭng lĕ rnoh prăk kon dơi n'hŭch an năch lah nklăp 20 rmen prăk. Đah ăp rnoh prăk manh mhe mpeh nău kan nkra njêng, tăch rgâl n'hanh nău kan an lor, ntŭk kan mbơh ƀư n'hŭch rnoh prăk kon ntơm bah 1,5–2%/năm".

Đah bơi 18.750 doanh nghiệp n'hanh rlău 82.000 rnăk tăch rgâl dôl pah kan, nsum mpôl doanh nghiệp geh nău kan khlay đah hun hao wăng sa n'hanh tơm prăk bah n'gor Dak Lak. Tĭng wa Nguyễn Quang Vinh, Kruanh Hội Doanh nhân n'gor Dak Lak, nău Chính phủ rđău đă n'hŭch prăk kon tâm rnôk aơ geh nkô̆ nău ngăn ngên, kơl doanh nghiệp n'hŭch prăk dŏng kan, lơn lah tâm rnôk prăk dŏng bôk năp hao n'hanh ntŭk tăch rgâl hôm âk nău rgâl. Wa Vinh dăn đă, ăp ngân hàng mbơh ƀư tâm ban, gay trong kơl ƀư uĕh tam jru hvi lơn. "Chính phủ aƀaơ geh trong rƀŏng dŭt uĕh tâm nău ntop kơl ăp doanh nghiệp dôl mâp jêr jŏt, lơn lah doanh nghiệp tăch n'gluh, doanh nghiệp tâm nău kan tuch tăm n'hanh doanh nghiệp jêt n'hanh dah găp. Tĭng trong rƀŏng nĕ, gâp ŭch ăp ngân hàng ơm tâm ban ŭch, mbơh ƀư tâm ban gay ndơ̆ rnoh prăk kon nsum jŭr thuk lơn, ntop kơl doanh nghiệp n'hŭch jêr prăk dŏng an manh".

Dak Lak aƀaơ geh 46 ntŭk kan ngân hàng tâm dak n'hanh dak bah dih pah kan, đah dĭng lĕ rnoh rnon bơi 300.000 rmen prăk. Aơ lah tơm ndơ khlay gay ăp ntŭk kan an manh hăn ndrel, ntop kơl nsum mpôl doanh nghiệp n'hanh rnăk tăch rgâl hun hao. Nău nchrăp lor n'hŭch prăk kon an manh mô knŭng kơl năch n'hŭch prăk dŏng ntuh kơl, n'hŭch jâk prăk kaih ma hôm njêng tay tơm ndơ ntuh kơl, pơk hvi nkra njêng, tăch rgâl.