Ntŭk ƀư poăch ndrôk ih kro Huy Vũ Đăk Đoa n’gor Gia Lai way geh ndăn ƀư nău kan tâl dŭng gay ma njoăl ndơ an dak bah dih. Ta meng ntŭk tâl dŭng, yuh Nguyễn Thị Diễm Kiều- tơm ntŭk leo kan aơ, an du ntŭk nsưng jê̆, du ngan poăch ndrôk ih kro, bar pe mblâm dŭng tâl n’hanh điện thoaị ta ndrơng gay ma livestream tăch ndơ. Yuh Kiêù mbơh, 3 năm ba năp, bol ma poăch ndrôk ih kro bâh nơm lĕ geh kơp dơn OCOP 4 sao gưl n’gor, yơn hôm nha jêr ma tâm rlong đah ăp ntil ndơ ntoh lư ta ntŭk tăch rgâl. geh ntil ndơ, rnoh tăch kanŭng ê hŏ tât 10 rbăn prăk/kg. Tâm rnôk nĕ, rgâl mhe rnoh mbrô, ndơ̆ ntil ndơ tât ta ăp ntŭk tăch rgâl điện tử lĕ kơl an yuh geh nău rgâl tay. Yuh Nguyễn Thị Diễm Kiều an gĭt, geh rnôk nău geh bâh 1 rmen prăk/khay n’hanh lĕ geh ăp ntŭk tăch ndơ an tât Singapore, "Nău ngăn, ntŭk tăch ndơ nchrai kanŭng hao tay bâh 10% tât 15% yơn nău geh lah ăp ntil ndơ geh âk nuĭh ŭch n’hanh nău rvăt âk đŏng.Rnoh kan ndrel geh gĭt tât hên bâh ăp ntŭk kan trực tuyến geh rnoh dŭt âk. Nău rgâl rnoh mbrô kơt aơ lĕ kơl an công ty dŭt âk ngăn. Rnôk nău nkoch mpeh nău nchrăp pah kan ƀư ntil ndơ geh trĕ lam, ăp nuĭh geh gĭt n’hanh gĭt na nê̆ nkô̆ nău ndơ jêng hao khlăy, năch rvăt ndơ aƀaơ gĭt vât ngăn. ăp công ty mât uănh tât nău ueh ndơ lĕ ký tâm ton đah hên dŭt âk ngăn hôm”.

Ta Công ty Cổ phần Nông nghiệp AgriS Gia Lai (phường Ayun Pa, Gia Lai), rgâl mhe rnoh mbrô lĕ geh mbơh tơih tâm ban n’hanh lĕ rngôch tâm nău mât uănh ta nkual ƀư tăm tao. Tĭng wa Trần Thị Lê - groi Giám đốc rnâng kan công ty, nău dŏng công nghệ rnoh mbrô kơl an doanh nghiệp doh rklaih săk rnglăy ăp nău mbơh mpeh mât uănh rnoh prăk, ntuh kơl tâm di, nkre lah kloh rjăp lĕ rngôch trong kan leo kan. Ngăn lah tâm nău pe lêh mât prăp, trong kan rnoh mbrô an uănh năl na nê̆ nuĭh tơm mât ta ăp rnoh tao, der geh vĭ wĕ đah ăp rnăk tăm, ƀư tĭng nău nchrăp kan pĕ lêh n’hanh an geh ueh nău kan bâh ngih máy.

Mô rlu tay ta ăp nău geh bôk năp, Agris Gia Lai geh pơk hvi tay nău rgâl mhe rnoh mbrô bâh ăp bôk nău kan Demo Farm ntŭk geh rdâk njêng gay ma ƀư tơm lor. Doanh nghiệp rgum ăp rnoh mbrô têh bâh ntil ndơ neh, rnoh mbrô trôk nar gay ma ndơ̆ mbơh ngăch ndăn an ƀon lan mpeh nar mât tăm, kĩ thuật tăm n’hanh ntrong kan njrăng bu tuh. Nău kan na nê̆ ntuh kơl tĭng nkual neh n’hanh mih sial bâh ăp nkual mô dơn n’hao nău geh pah kan tăm tao ma hôm nha mpŏng tât rdâk njêng nkual tuch tăm ueh mhe, nâp nâl, ntop kơl an ƀon lan đăp mpăn nău rêh jêng. Wa Trần Thị Lê an gĭt. "Mpeh nău dŏng công nghệ rnoh mbrô, aƀaơ công ty ƀư tĭng mât uănh tĭng ăp nkual neh tăm. Mpôl hên lĕ geh veh n’hanh mbơh rnoh brô ta bản đồ MapInfo. nău mât uănh na nê̆ ta rnoh neh tâm rgop đah phần mềm mât uănh ndeh nchoăn rdeng TMS kơl an mât đăp mpăn kach rek di rnoh lŏ n’hanh di rnoh hvi. Rnoh geh lôch pĕ lêh geh ndơ̆ mbơh mpeh ngih máy tâm 24 mông, mât đăp mpăn ƀon lan kan lŏ mir mô geh roh rui tao”.

Rgâl mhe rnoh mbrô dôl njêng ăp nău rgâl mhe na nê̆ tâm ndơ tuch tăm Gia Lai. Lam n’gor lĕ geh pă an 308 rnoh mbrô rlău 10.700 ha, tâm nĕ geh 255 rnoh mbrô nkual tăm gay ma tăch an dak bah dih đah rlău 10.240ha n’hanh 53 rnoh mrbô nkual tăm ta ntŭk, geh tâm di đah nău ŭch mpeh kĩ thuật bâh ăp ntŭk tăch rgâl Nhật Bản, Hàn Quốc, Trung Quốc n’hanh Châu Âu. Tâm nău tăch rvăt, ăp nar lơ ma geh âk ƀon lan kan lŏ mir, tăch sŏng dăng tât nuĭh dŏng ndơ. Năm 2025, rnoh tăch rgâl điện tử bâh Gia Lai hao 9 gưl, pă dăp tal 37/63 n’gor, nkuăl ƀon têh, nkoch mbơh săk rnglăy bôk năp bâh nău ndơ̆ ndơ tuch tăm tât ta ntŭk tăch rgâl rnoh mbrô. Wa Nguyễn Thị Bích Thu, Giám đốc ntŭk kan khuyến Công n’hanh mbơh nău tăch rgâl bâh sở công thương Gia Lai an gĭr ăp ntil ndơ rgâl mhe rnoh mbrô lah rmôt ndơ dơh geh dăch đah nuĭh dŏng ngăn tâm nău bên rvăt năp ndơ ta ntŭk tăch rgâl điện tử."Lah nkoch mpeh ăp ntil ndơ rgâl mhe rnoh mbrô na nê̆, nĕ lah ăp ntil ndơ tuch tăm kloh ueh geh ƀư tĭng nău khlăy. Bâh nău tuch tăm tât pĕ lêh n’hanh pah kan mpôn, geh tu tơm na nê̆, geh ntŭk ntĭm leo na nê̆ n’hanh ăp nău kơp dơn tâm di. Ăp ntil ndơ aơ dôl geh dăch đah nuĭh dŏng ngăn. Mpeh đah ntŭk kan hên, mbra geh ăp bôk nău kan kơl an, hăn ndrel đah ăp bôk nău kan mbơh tơih, gay ma kơl an doanh nghiệp hun hao lơn”.

Nghị quyết Đại hội Đảng bộ n’gor Gia Lai tal 1, năm kan 2025-2030 uănh năl nău rgâl mhe rnoh mbrô lah trong kan tơm mhe tâm nău hun hao khoa học- công nghệ, rgâl mhe mĭn kan n’hanh nău wăng sa mbrô, ndrel đah njêng tay n’gâng kan tuch tăm n’hanh n’hao nău dơi tâm rlong. Ntrong kan aơ mbra lah nău nchŏng gay ma rgâl mhe rnoh mbrô geh mbơh tơih tâm ban, têh hvi lơn, pơk trong an ndơ tuch tăm ta Gia Lai lăp ta ntŭk tăch rgâl aƀaơ đah nău ueh, rnoh mbrô n’hanh nău khlăy nâp nâl.