Ăp nar êp Tết Bính Ngọ 2026, njok 2 đah kơh dak me Đa Nhim, kônh wa tăm biăp, bum, play ta ăp xă D’ran, Ka Đô, Đơn Dương... n’gor Lâm Đồng hôm e mô ru. Ndrĭ yơn, ndơn mông nar n’gŭr răm rôk biăp rhŏ an ntŭk tăch Tết kơt ăp năm bah năp, rnôk aơ, nuĭh ƀon lan ntŭk aơ rgum nkra neh, nglăp trong dĭng tŏ n’hanh jŭr ntil tơm tăm mhe.

Wa Phạm Bích, ta thôn Đường Mới, xă D’ran an gĭt, mih dak lip dŭt năm 2025 lĕ ƀư âk rnoh neh tăm biăp mper dak me lĕ bŭl, geh ntŭk geh pĭch rlâm hô. Nău nkra tay mir ndrĭ roh âk soan n’hanh prăk. Ta năp măt, âk rnăk săch trong nkra tay neh ntŭk tât, tăm tay biăp tât nĕ:

Geh nuĭh ri tăm su hào, cải dưa, blân srat, mrăch gŭng. Kơt aơ ri neh gay tăm xà lách. Tâm bŏng khay 1 mư geh sa. Aƀaơ ri mô geh sa tâm Tết mô geh ngăch mông nar.

Tâm rơh mih dak lip dŭt năm 2025, xă D’ran lah ngoăy tâm âk ntŭk geh khuch khat hô ngăn bah nkual têh tăm biăp Đơn Dương đah bơi 300 ha biăp sa geh dak klôn rdu. Wa Trương Quang Kiên, Groi kruanh UBND xă D’ran an gĭt, tâm rnôk nkra tay tuch tăm, n’gâng kan ƀon lan lĕ hăn ndrel đah nuĭh ƀon lan, ntop kơl nkra nu nău neh ntu, neh blak gay nkra tay neh mir. Nkre, xă dăn đă ăp nău ntop kơl gay kơl kônh wa ơm nthoi tay tuch tăm:

Gưl ủy Đảng, n’gâng kan ƀon lan lĕ rgŏ jă n’hanh pah kan đah rmôt ngân hàng nta an nuĭh ƀon lan gay nuĭh ƀon lan manh đah prăk kon đêt mkra tay tuch tăm jêh dak lip. Gưl ủy, n’gâng kan ƀon lan lĕ ntrŭt đă kônh wa nkra tay neh gay nkra njêng tăm ăp ntil tơm tĭng yan, ăp ntil biăp đêt nar gay geh prăk. Tât rnôk aƀaơ nău nkra tay trôk nar lơh rnoh neh srih tăm rlău 70%.

Bôl Tết aơ, âk rnăk tăm biăp ta nkual têh tăm biăp Đơn Dương mô geh ndơ ndơ̆ an ntŭk tăch, yơn rlău âk lŏ mir tă geh neh lŭ bŭl, ăp nkŭr nđĭr lĕ ntơm hao. Nĕ lah nău mbơh bah nău rêh tay, pơk luh nău mpŏng ŭch đah ăp yan mhe đah nău răm mbra ơm plơ̆ tay đah nuĭh ƀon lan nkual tăm biăp têh bah n’gor Lâm Đồng.