Hăn dak lêng bah ăp nar bôk năm 2026, ăp nar dja bar pe jât bôk duk lơh joi ka nklang dak lêng ta ăp xã meng dak lêng mpeh luh nar n’gor Dak Lak hŏ plơ̆ sĭt ndrâm dak lêng tâm nău rhơn ka bêng duk. Rnoh geh nhŭp âk, lơh joi ka ngừ đăp mpăn, kơl ƀon lan lơh joi ka nsĭt geh wăng sa mbơm oi, rhơn nđơr wơt tết Bính Ngọ.

  Ta ndrâm ka Đông Tác mpeh phường Phú Yên, n’gor Dak Lak,  22 duk lơh joi ka nsrŭng tât ndrâm nsĭt nkre bar pe jât tấn ka ngừ đại dương gay tăch an ăp doanh nghiệp tui ka. Rĭng ăp duk lơh joi ka geh ntơm bah 50 tât 70 mblâm ka ngừ đại dương, tâm ban đah ntơm bah 2,5 tât 3 tấn ka. Êng kơt duk lơh joi ka bah wa Phùng Hồng Ánh nsĭt geh 90 mblâm ka ngừ. Duk wa Bùi Văn Xông lơh joi geh rlău 70 mblâm. Rnoh khlay ka ngừ chiăng êr bôk năm dơi ăp doanh nghiệp rgum rvăt rlău 100 rbăn prăk/kg, tâm ban đah ăp năm bah năp nơh.

Rnoh geh ka âk, rnoh khlay đăp mpăn, nuĭh ƀon lan lơh joi ka nsĭt geh wăng sa mbơm oi. Wa Bùi Văn Xông, phường Phú Yên, n’gor Dak Lak rhơn an gĭt:

“Năm aơ bôk năm nô nău lơh joi ka dơh uĕh an kônh wa, saơ rhơn nđơr đŏng, mhe hăn joi du bôk duk geh pơh pham jât mblâm ka ri ta năp măt lah uĕh trôk nar hôm. Rnoh âk geh ri uĕh hôm. Rnoh khlay ka ri đăp mpăn đŏng".

Nuĭh tơm duk nsĭt geh wăng sa âk, băl duk geh tơm wăng sa mbơm oi đŏng, geh ndơ dŏng sa tâm rnôk tết Bính Ngọ. Nuĭh ƀon lan lơh joi ka Phạm Đắc Dũng, nkual phố 4, phường Phú Yên rhơn nđơr:

"Năm aơ trôk nar uĕh, rngân sial, ka geh. He hăn bar jât nar rlău nsĭt geh rlău bar tấn, tâm pă du hê nklăp 15 - 16 rkeh prăk. Oh nô wăng sa geh hao, oh nô nsĭt geh wăng sa uĕh". 

Nău way, ntơm bah bôk khay jât ma bar tât khay ngoăy âm lịch lah rnôk ka ngừ đại dương ntoh âk. Lôch ăp rơh phŭt mbro, dak lêng rngân tay, ka ngừ ntoh âk hŏ kơl nuĭh ƀon lan lơh joi geh âk, nơm kơt nê kônh wa geh suan ntrôl gay nsan hao krêp dêh dak lêng tâm ăp nar tết n’hanh wơt giao thừa ta dak lêng. Du hê nuĭh ƀon lan lơh joi ka an gĭt:

“Lôch rnôk njing ka tăch, nuĭh ƀon lan way rlu nklăp 1 pơh lôch nê kônh wa mơ hăn tay dak lêng, sa tết ta nklang dak lêng, yor tâm du năm geh bar pe khay lah lơh joi geh dŭt âk dơm”.  

Kônh wa ŭch rŏng tâm năm mhe 2026 n’gâng kan tuch tăm mât rong Dak Lak nta trong dơh ntlơi quy định tin nhắn n’hanh rgâl ma trong groi nđôi njăr trong hăn gay dơh an kônh wa tâm siƀŭt ntop kơl pring xăng bah Chính phủ. Wa Đặng Cu Em, kruanh duk lơh joi ka PY91008TS mpơl nău rgop:

"Máy nhắn tin rlău jât năm aƀaơ hŏ ơm lĕ, nhắn mô hôm tŏng nău đŏng ôh. Jêng ŭch rŏng n’gâng kan dơi kan an ntlơi nău nhắn tin, dŏng ma trong groi nđôi njăr trong hăn bah kônh wa”.

  Ăp nar tết Bính Ngọ dăch tât lah rnôk ăp ndrâm ka, duk mpan grâm grâm luh lăp. Kônh wa ŭch rŏng năm mhe trôk nar rngân uĕh, ka jâk bêng jal, thẻ êr Châu Âu dơi rơih jăng gay rnoh khlay ka ngừ tăch n’gluh dơi ntruch hao đê̆, kơl nuĭh ƀon lan lơh joi ka hăn lơh joi ngai kơh bah ir jêr jŏt lôch năm mhe aơ nơh trôk nar lơh, dak bŭk dak băm khuch khat hô. Năm mhe lĕ rngôch ndrel nsum ti ndơ̆ nău kan lơh joi ka bah n’gor Dak Lak hun hao jŏ jong.