Tâm mông nar mô ru ăp nar dŭt năm, ndơ cà phê Miss EDE ta nkual ƀon têh Buôn Ma Thuột, n’gor Dak Lak lĕ geh rơh ndơ jêh nkret njêng bôk năp tăch n’gluh an Hoa Kỳ. Nĕ lah 18.000 dŭng cà phê wâr jêng ndơ tâl dŭng ta Việt Nam, nglăp rwăt yor doanh nghiệp ta tiểu bang Illinois, tâm pă ta siêu thị ta ntŭk. Wa Trần Phương Linh, ntoh măt nuĭh nglăp rwăt Hoa Kỳ ta Việt Nam an gĭt, dơi geh rơh ndơ aơ, 2 ding lĕ roh bơi n’gul năm tâm rgâl, tâm nchră n’hanh tâm ban ŭch ký ton kan ndrel.

Nău tŏng ăp nău ŭch tăch n’gluh mô dơh n’hanh đă nău ât, Mis EDE lĕ ƀư uĕh nău aơ n’hanh mpôl hên dŭt ŭch. Mpôl hên nsing nơm nău tâm boh kan ndrel rơh aơ mbra mô knŭng rlu ta aƀaơ ma hôm hun hao tâm rgŏ năp. Tâm năm tât, mpôl hên ton hăn ndrel đah Miss EĐE tâm nău rgâl ndơ n’hanh pơk hvi âk năch, hao ta lam ntŭr neh.

Năm 2024, Dak Lak tăch n’gluh geh 1,8 rmen đôlar đah rgop âk bah ăp ntil ndơ lŏ mir, âk doanh nghiệp mhe, ntil ndơ mhe rơh bôk năp dơi tăch n’gluh di trong. Ntơm bah bôk năm, Công ty Cổ phần Xuất Nhập khẩu Nutri Soil (nkual ƀon têh Buôn Ma Thuột) lĕ tăch n’gluh ndơ mắc ca Dak Lak bôk năp an Hàn Quốc, Công ty Cổ phần Banana Brothers Farm ta nkuăl M’Drắk tăch n’gluh prit, Công ty Cổ phần Xuất Nhật khẩu Yến sào Thành Dung (Krông Pắk) tăch n’gluh rsoăn lŭng lang...Tât aƀaơ, n’gor Dak Lak lĕ geh âk ntil ndơ lŏ mir dơi tăch n’gluh di trong an Trung Quốc. Âk ndơ lŏ mir nkret njêng hvi kơt Yến sào, grăp mắc ca lĕ dơi ăp nuĭh tăch bah Hàn Quốc, Trung Quốc ndơ̆ tâm ăp trong tăch ndơ tâm dak.

Rgop têh ngăn geh prăk tăch n’gluh bah n’gor tâm năm bah năp lah ăp ntil ndơ geh âk kơt cà phê, tiêu, sầu riêng, cao su, đah ăp doanh nghiệp blău ơm jŏ năm. Kơt Công ty trách nghiệp hữu hạn Môt thành viên xuất nhập khẩu 2-9 (Simexco) Dak Lak, lĕ geh nklăp 125 rbăn tấn cà phê dơi tăch n’gluh tât 89 dak n’hanh nkual neh. Wa Lê Đức Huy, Kruanh Hội đồng thành viên nkre ƀư Tổng Giám đốc công ty nkoch, knŭng tâm 10 khay năm 2024 công ty lĕ geh prăk tăch n’gluh rlău 300 rkeh đôlar.

Ăp ntil ndơ khlay bah Tây Nguyên ri dŭt âk yơn Simexco tĭng âk đah 2 ntil ndơ khlay lah cà phê n’hanh tiêu, n’hanh nău ŭch tăch 2 ntil ndơ aơ ta lam ntŭr neh uĕh lơn năm dăch aơ. He gĭt ƀư moh êng ndơ n’hanh n’hao uĕh ri rnoh khlay mbra dơi hao tay.

Tĭng wa Lưu Văn Khôi, Giám đốc N’gâng kan Công thương Dak Lak, tăch n’gluh ndơ lŏ mir nkret njêng hvi lah nău rƀŏng bah n’gor gay n’hao khlay n’hanh uĕh ndơ lŏ mir ta ntŭk. Aƀaơ, ăp ntil ndơ lŏ mir nkret njêng bah Dak Lak lĕ hao tât rlău 70 dak n’hanh nkual neh ta lam ntŭr neh, tâm ne âk ntil ndơ geh khlay tăch n’gluh n’hanh dơi tâm rlong uĕh. Lam n’gor aƀaơ geh rlău 520 ntŭk nkret njêng ndơ lŏ mir, rgum tâm ăp ndơ khlay kơt cà phê, mắc ca, ca cao, điều, phe, ê nkra play rih, play pâr, play nklâm nđik... Gay geh nău rƀŏng dĭng lĕ geh prăk tăch n’gluh geh 1,7 rmen đôlar tâm năm 2025 aơ, n’gor lĕ ndâk ƀư trong nchrăp đah ăp trong mkra na nê̆, ngăn ngên. Wa Lưu Văn Khôi an gĭt:

Năm tât ri mpôl hên mbra geh ăp trong ƀư nău kơl gay ntop kơl an doanh nghiệp nar lơ ntuh kơl uĕh lơn công nghệ mpeh prăk, mpeh mpla nsơ ăp ndơ, gay ăp ndơ nkret njêng jru hvi nar lơ lăp tâm ăp ntŭk tăch têh ta lam ntŭr neh.

Lăp tâm năm mhe đah âk nău rƀŏng n’hanh mpŏng kâp mhe, n’gor Dak Lak nsrôih tay gay lôch jêh ăp rnoh an ƀư nău kan n’gluh an tâm năm n’hanh lĕ lvang. Đah ăp săk rnglăy uĕh tâm năm bah năp, n’gâng kan ƀon lan n’hanh nuĭh ƀon lan ta ntŭk dôl rhơn wơt du năm mhe đah âk nău nsing nơm, mpŏng ŭch mhe.