VOV4.Xơ Đăng - Klêi kơ’nâi 2 ngế kăn ƀô̆ khăm pơlât ti tăng mơngế tro tâ pơreăng klêi khăm ngăn yương tĭnh ƀă SARS-CoV-2, hâi lơ 10/11, kơvâ ngăn pơkeăng ƀă khăm pơlât kong pơlê Kon Tum hiăng thâ tơkŭm po séa ngăn, mơnhên, ti tăng ngế tro tâ pơreăng pêi pro tơdroăng hbrâ mơdât pơreăng. Péa ngế kăn ƀô̆ châ hlo yương tĭnh ƀă SARS-CoV-2 cho T.V.M, 58 hơnăm, pêi cheăng a Tíu xiâm mơdât pơreăng kong pơlê Kon Tum – Tíu pêi cheăng 1 ƀă H.T.M.L, 39 hơnăm, pêi cheăng a Hngêi pơkeăng bêng Duy Tân, pơlê kong kơdrâm Kon Tum.

Châ hlo 2 ngế kăn ƀô̆ ti tăng mâu ngế tro tâ pơreăng tro COVID-19, pơlê kong kơdrâm Kon Tum thâ pêi pro tơdroăng hbrâ mơdât pơreăng

Rơtế ƀă 2 F0 cho kăn ƀô̆ khăm pơlât, a pơlê kong kơdrâm Kon Tum xuân châ hlo 1 ngế F0 nếo tung pơlê pơla cho N.X.L, 46 hơnăm ối a bêng Quyết Thắng. Klêi kơ’nâi châ hlo 3 ngế F0 tung pơlê pơla  a pơlê kong kơdrâm Kon Tum, kơvâ ngăn pơkeăng ƀă khăm pơlât kong pơlê Kon Tum hiăng thâ tơkŭm po séa ngăn, mơnhên, ti tăng mâu ngế tro tâ pơreăng pêi pro tơdroăng hbrâ mơdât pơreăng. Xêo troh 6 chôu kơxo hâi lơ 10/11, kong pơlê Kon Tum châ hlo 327 ngế tro tâ COVID-19.

A Sa Ly tơplôu- tơbleăng