VOV4.Xơ Đăng - Hâi lơ 16/11, ƀok thái pơkeăng Trần Thuận – Kăn pơkuâ Tíu xiâm ngăn pơkeăng ƀă khăm pơlât tơring Krông Ƀúk, kong pơlê Dak Lak tối ăm ‘nâi tung tơring nếo châ hlo 6 ngế kăn ƀô̆ dế pêi cheăng a Viƀan tơring Krông Ƀúk klêi test rĕng pơreăng ai yương tĭnh ƀă SARS-CoV-2, tung mê ai 5 ngế dế pêi cheăng a Ƀơrô pơkuâ tơmeăm khoăng tung kơdâm tơnêi ƀă loăng pơlái kong kế tơring Krông Ƀúk yương tĭnh ƀă SARS-CoV-2. Klêi kơ’nâi châ ‘nâi nhên mâu tơdroăng mê, Tíu xiâm khăm pơlât tơring Krông Ƀúk hiăng ti tăng, tôe xo têa môh khăm ngăn ăm mâu ngế ki tơdjâk.

Dak Lak: 6 ngế pêi cheăng tung Viƀan tơring Krông Ƀúk yương tĭnh ƀă SARS-CoV-2

Vâ tơniăn tơdroăng hbrâ, mơdât pơreăng, khu cheăng hiăng hnhâng kơxái mơdât ôh tá ăm mot lo pa gong a tíu pêi cheăng Viƀan tơring Krông Ƀúk tơdjâk troh mâu ngế yương tĭnh ƀă SARS-CoV-2. Mâu ngế F1 châ klâ kơtăn tiô pơkâ. Xêo troh kơhâi dế lơ 16/11, lâp kong pơlê Dak Lak châ hlo 6.154 ngế tro tâ COVID-19, tung mê, ai 3.493 ngế hiăng pơlât prêi ƀă lo hngêi pơkeăng.

A Sa Ly tơplôu ƀă tơbleăng