VOV4.Sêdang -  Kơxê lơ 4/11, tiô tơbleăng dêi Tíu xiâm khăm pơlât tơring Krông Năng, kong pơlê Dak Lak tung tơring nếo châ hlo tơ’nôm 63 ngế test rĕng pơreăng yương tĭnh ƀă SARS-CoV-2 a ƀuôn Wik, ƀuôn Đê ƀă ƀuôn Giêr, cheăm Ea Hồ. Hdrối mê, a kơxo lơ 3/11, klêi kơ’nâi châ hlo 2 ngế hok tro tung cheăm Ea Hồ yương tĭnh ƀă SARS-CoV-2 a hâi lơ 1/11, khu cheăng hiăng tơkŭm séa ngăn ti tăng mâu ngế ki ối achê ƀă 2 ngế o hok tro kố mê pơtối châ hlo 3 ngế tung rơpŏng 2 ngế hok tro yương tĭnh ƀă SARS-CoV-2.

Test rĕng ăm kuăn pơlê a 3 pơlê a cheăm Ea Hồ, Krông Năng

Po rơdâ ti tăng mâu ngế ki ối achê ƀă mâu ngế tro tâ pơreăng nếo tối kơpêng mê, Tíu xiâm khăm pơlât tơring Krông Năng châ hlo tâi tâng mâu ngế tro tâ pơreăng ai tơdjâk môi tíu ‘mế kiâ a cheăm Ea Hồ a hâi lơ 29/10. Nôkố tơdroăng ti tăng mơngế tro tâ pơreăng, tôe xo têa môh khăm ngăn kuăn pơlê a 3 pơlê pơtối  châ thâ pêi pro.