VOV4.Xơ Đăng - Tiô Tíu xiâm séa ngăn pơreăng kong pơlê Dak Lak, riân troh lơ 18/11, lâp tung kong pơlê hiăng châ pâk lối 1 rơtuh 300 rơpâu klŏng vaccine mơdât COVID-19 tung tâi tâng kơxô̆ 1 rơtuh 335 rơpâu ngế kơpêng 18 hơnăm. Ing mê, troh hâi lơ 18/11, kong pơlê Dak Lak hiăng châ khu xiâm ngăn pơkeăng pơlât xing xoăng 12 rôh pâk vaccine hbrâ mơdât COVID-19 ƀă 1 rơtuh 262 rơpâu 48 klŏng vâ pâk ăm kuăn pơlê ing 18 hơnăm tơngi klêng. Dak Lak hiăng ai 88,82% kơxô̆ ngế ing 18 hơnăm châ pâk hbrâ mơdât COVID-19 trum má 1, kơxô̆ mơngế pâk trum má 2 châ 10%.

Dak Lak: Vâ chê 90% ngế kuăn pơlê ing 18 hơnăm tơngi klêng hiăng châ pâk vaccine hbrâ mơdât Covid-19 trum má 1 

Tiô pôa Nay Phi La, Ngế pơkuâ khu xiâm ngăn pơkeăng khăm pơlât kong pơlê Dak Lak tối, vâ tơniăn pâk tŭm 2 trum vaccine ăm tâi tâng kơxô̆ mơngế ing 18 hơnăm, ƀă châ pâk lâp 80% ngế kuăn pơlê ing 12 hơnăm tơngi klêng, tung la ngiâ, kong pơlê kal dâng 1 rơtuh 800 rơpâu klŏng vaccine. Nôkố lâp tung kong pơlê ai 236 tíu pâk, tâng kal kô tơkŭm po tâk 500 khu pâk ăm dâng 200.000 ngế/hâi. Kơvâ ngăn pơkeăng kong pơlê Dak Lak hiăng chêh pơkâ nhên ăm tơrêm ngế vâ drêng vaccine troh kô tơbleăng pâk vâ teăm tơdrêng.

Gương tơplôu ƀă tơbleăng