VOV4.Xơ Đăng - Kơxo lơ 19/11, tơbleăng ing Khu hnê mơhno hbrâ, mơdât pơreăng tơring Đăk Đoa, kong pơlê Gia Lai, klêi kơ’nâi test rĕng, tơring nếo châ hlo 125 ngế yương tĭnh SARS-CoV-2. Tung mê, 58 ngế hiăng klêi khăm ngăn mơnhên Real time PCR yương tĭnh. Nôkố ai 5/8 thôn, pơlê a cheăm Hà Bầu ai ngế tro tâ COVID-19. Akố, hên tíu pơreăng xông tâ tú ó tro kâng kơxái mơdât ôh tá ăm lo pa gong vâ ti tăng mơngế tro tâ tôe xo têa môh khăm ngăn pơreăng môi tiah Hngêi trung râ má môi Hà Bầu; hngêi mơhno túa lĕm tro pơlê pơla cheăm Hà Bầu; mâu tíu tê mơdró ôu kơphế, tíu pôe xâk a pŭn hơlâ troăng tơkăng pơla Hà Bầu ƀă cheăm Nam Yang, tơring Đăk Đoa.

Châ hlo pơreăng COVID-19 xông tâ tú a cheăm Hà Bầu – tơring Đăk Đoa, Gia Lai 

Khu hnê mơhno hbrâ, mơdât pơreăng COVID-19 kong pơlê Gia Lai hiăng pơtroh khu râ kăn pêi cheăng troh tơring Đăk Đoa vâ tơrŭm pêi pro mâu troăng hbrâ, mơdât pơreăng. Tơring Đăk Đoa pơkâ thế kuăn pơlê pêi pro kơtăng pơkâ 5K; ôh tá tơkŭm kơdrâm mơngế; teăm tơbleăng tơdrêng ăm khu râ kăn pơkuâ drêng ai tro tơdjâk mâu ngế tro tâ pơreăng, mâu tíu ai ngế tro tâ, lơ drêng tung châ hlo ai tơngê, kơ-o, ôh tá kâi hiâm.

A Sa Ly tơplôu ƀă tơbleăng