Tíu ki ai pơreăng lo xêi mê cho a cheăm Ea Bhôk ƀă Drai Bhăng ƀă 2 ngế yương tĭnh ƀă pơreăng lo xêi. Tiô ƀok thái pơkeăng Nguyễn Khắc Dũng – Kăn pơkuâ Tíu xiâm ngăn pơkeăng pơlât tơring Čư̆ Kuiñ, kong pơlê Dak Lak, klêi kơ’nâi ‘nâi ai tíu pơreăng, Tíu xiâm hiăng tơrŭm ƀă Tíu xiâm Hbrâ mơdât pơreăng ƀă Hngêi pơkeăng cheăm lăm ngăn mâu ngế ki tro pơreăng, xôh trếo pơkeăng Cloramin B a tíu ki ai pơreăng.

Klêi mê, hnê mơhno mâu rơpŏng túa ki xut xêa kế xah, kế ‘măn tơmeăm kâ ôu, tíu ối dêi vâi hdrêng ƀă hnê tối tơdrêng hnoăng cheăng hbrâ mơdât pơreăng lo xêi kơpong tâ tá hngêi ki ai ngế tro pơreăng. Tơdrêng amê hlối séa ngăn, riân tâi tâng vâi hdrêng pá xôp 5 hơnăm tá hâi châ pâk vaccine, pâk tá hâi tŭm trum lơ ôh tá ‘nâi nhên tơdroăng ki pâk vaccine hbrâ mơdât lo xêi, rubella vâ pâk tŭm tâi ăm vâi hdrêng.