Ing mê, kong pơlê Gia Lai pêi ahdrối ‘no liăn mơjiâng, mơdêk ƀă rôe tơmeăm ăm 24 hngêi pơkeăng cheăm dêi kơ pong tíu tơkăng kong, kơpong xơpá. Mâu tơdroăng pro rơdâ pro khu hngêi pêi cheăng, pro nếo tíu vâ khăm ngăn vâ ‘nâi ing um xup, xét nghiệm, siêu âm, pơlât tơdrêng apoăng, pro troăng mơ’no tah têa ‘mêi hngêi pơkeăng ƀă tơmeăm khoăng ki ê. Tâi tâng kơxô̆ liăn tối vâ mơjiâng apoăng ăm tơdroăng mê dâng 288 rơtal liăn.

Tơdrêng ƀă ‘no liăn pro hngêi pơkeăng rôe tơmeăm xúa, kong pơlê Gia Lai xuân pâ thế tơbleăng luât pơkâ tŏng gum khăm ivá tiô khế pơkâ khăm tê kơtê ăm kuăn pơlê a 12 to cheăm tơkăng kong, rơlố ƀă kơtiê xơpá. Mâu ki châ khăm cho kuăn ngo, mâu hơnăm hiăng krâ, mâu ngế ai hnoăng tơnêi têa, mâu ngế châ tơnêi têa tŏng gum, rơpŏng kơtiê, vâ chê kơtiê, vâi kơdrâi ki dế tro hơnăm ai kuăn ƀă vâi hdrêng pá xôp 6 hơnăm.

Tơdroăng khăm ivá kô rơtế ƀă chêh pro hồ sơ ivá điê̆n tưh, hnê tối, rĕng châ ‘nâi pơreăng hlối pơtroh pơlât ăm râ kơpêng drêng kal vâ teăm pơlât tơdrêng.

Tơdrêng amê, Hô̆i đong hnê ngăn kong pơlê Gia Lai xuân dế mơjiâng tơdroăng pơkâ ki nếo 'na troăng hơlâ mơhnhôk ƀă kơjo kum ƀă ƀok thái pơkeăng, dược sĩ tung kong pơlê. Troăng hơlâ kố tơmiât troh khu ƀok thái pơkeăng pêi cheăng a mâu hngêi pơkeăng, tíu xiâm khăm pơlât, hngêi pơkeăng kơpong hdroâng kuăn ngo, kong ngo, cheăm tơkăng kong, cheăm rơlố ƀă mâu tíu khăm pơlât tơnêi têa ki ê dêi kong pơlê.

Hdrối ai luât pơkâ ki nếo, kong pơlê pêi pro pơkâ rah xo tơ’nôm ƀok thái pơkeăng troh a cheăm. Jâ Nguyễn Thị Thanh Lịch,  Phŏ Kăn hnê ngăn Vi ƀan kong pơlê Gia Lai tối ăm 'nâi:

 “Kong pơlê pơkâ hên troăng hơlâ 'na mơhnhôk la iâ ƀok thái pơkeăng vâ troh lăm pêi cheăng. Nôkố, kơlo mơhnhôk mơngế pêi cheăng hên má môi dêi ngin cho 600 rơtuh liăn ăm môi ngế ƀok thái pơkeăng ƀă tŏng kum liăn mung hngêi ối. Ngin hiăng pơkâ troăng hơlâ vâ pơtroh thế, pơhlêh mâu ƀok thái pơkeăng chu lăm pêi cheăng a cheăm".

Nôkố lâp kong pơlê Gia Lai ai 135 to hngêi pơkeăng ƀă 369 tíu pêi cheăng khăm pơlât, khăm pơlât ăm hên pơ'leăng mâ mơngế 26.800 ngế/môi hngêi pơkeăng. Laga, mơngế ƀok thái pơkeăng xing xoăng tá hâi tơdâng tơ'mô. Kong pơlê ối 76 tíu hngêi pơkeăng tá hâi ai ƀok thái pơkeăng pêi cheăng. Tiô pơkâ, tung hơnăm kố kong pơlê Gia Lai pơtroh 38 ngế ƀok thái pơkeăng ing mâu hngêi pơkeăng kân, hngêi pơkeăng cheăm, tíu khăm pơlât dêi tơnêi têa troh veăng kum 30 to cheăm, bêng ki kal vâ.

Tơdroăng pơkâ pơtroh ƀok thái pơkeăng lăm troh a cheăm dêi kong pơlê Gia Lai pêi pro sap hơnăm 2026 troh hơnăm 2030. Hâi khế hơnăm ƀok thái pơkeăng lăm pêi cheăng a cheăm ki iâ gá 6 khế ƀă hên tâ 12 khế, kô chiâng pêi lăm pêi cheăng hên rôh la thế rak tơniăn tâi tâng tiô hâi khế hiăng pơkâ. Ing tơdroăng ki châ tơƀrê tơbleăng ƀă tơdroăng rah xo mơngế ngăn pơkeăng pơlât lăm pêi cheăng, Khu xiâm ngăn pơkeăng ƀă khăm pơlât kô tí tăng 'nâi plĕng ăm Vi ƀan kong pơlê Gia Lai pơkâ kơxô̆ ƀok thái pơkeăng ƀă kơpong pơtối pơtroh lăm tŏng kum tung mâu hơnăm pơtối.