Riân sap ing hâi lơ 15 troh lơ 18/8, mâu cheăm Krông Pač, Čư̆ Mgar, Krông Năng ƀă Rôh po kơchơ tê tung hyôh măng a Kơpong mơđah tơbleăng plâi a Rôh po kơchơ tê plâi sầu riêng kong pơlê Dak Lak hiăng tơkŭm po 8 rôh livestream tê plâi sầu riêng. Mâu rôh livestream kố tơ’mot lối 2 rơtuh ngế ngăn.

Tung mê, mâu rôh livestream tê plâi sầu riêng a cheăm Krông Năng châ hên má môi, drêng tơmối kok roê châ lối 5.000 đơn, tê dâng 24 tâ̆n sầu riêng, châ xo dâng 2 rơtal 400 rơtuh liăn.

Rơtế ƀă tê plâi sầu riêng ing troăng hyôh internet, mâu rôh po livestream kố ối tơbleăng, mơđah 21 túa tơmeăm OCOP dêi mâu khu mơdró kâ, khu pêi cheăng tơrŭm ƀă rơpŏng tê mơdró a kong pơlê.

Veăng ai mâ tung mâu rôh po livestream ôh tá xê ai to khu ki dó inâi KOL (ngế ki châ vâi ô eăng), KOC (ngế ki roê xúa châ vâi ô eăng) rơkê mê ối ai kăn ƀô̆, mơngế cheăng tơnêi têa, Đoân droh rơtăm, khu mơdró kâ ƀă mâu ngế ki rơkê ‘na mâu kế tơmeăm dêi kong pơlê.

Tơdroăng “Rêm cheăm môi KOL, KOC tê sầu riêng online” pro chiâng tơdroăng ki nếo má môi tung pơkâ mơdêk tê mơdró a Leh tơbleăng Sầu riêng Dak Lak hơnăm 2026, tơdrêng amê hlối po rơdâ rôh vâ djâ sầu riêng Dak Lak troh ƀă mâu ngế ki roê kâ tung lâp tơnêi ƀă rế hía rế mơjiâng khu tê mơdró tung điê̆n tưh ing mâu pơlê cheăm.