Leh tơbleăng plâi Sầu riêng Dak Lak hơnăm 2026 kô po sap hâi lơ 15/8 troh lơ 2/9, ai dâng 1.000 ngế teăng mâ lo ing mâu kong pơlê, pơlê kong kân, mâu khu xiâm, kơvâ cheăng xiâm tơnêi têa ƀă lối 400 ngế kăn tung lâp plâi tơnêi veăng troh ngăn. Tơdrêng ƀă mâu khu tơmối krếo troh, Leh tơbleăng kô tơ’mot dâng 25.000 troh 30.000 tomối tung tơnêi têa ƀă kong têa ê troh ngăn.

Vâ tơniăn ‘na kế kâ a hâi Leh tơbleăng, kơvâ ngăn pơkeăng kong pơlê Dak Lak hiăng mơjiâng pơkâ, tơbleăng ăm mâu cheăm bêng tíu ki ai po leh tơbleăng; pakĭng mê, khu xiâm séa ngăn hlối tăng ngăn, tí tăng mâu tíu koi ối pơtê, hngêi pế pơchên kế kâ, Hngêi ăm tơmối kâ koi ối pơtê, tăng ngăn vâ ‘nâi ‘na tơdroăng pêi cheăng, hbrâ mơdât tơpâ on chếo ƀă rak tơniăn krúa ‘na kế kâ.

Kơvâ ngăn pơkeăng xuân hiăng mơnhông hnoăng hnê tối, pơkâ thế kuăn pơlê, mơngế pêt sầu riêng ƀă mâu tíu tê mơdró ki ối môi tíu, mâu khu mơdró ukố umê pêi pro tro mâu luât pơkâ athế rak tơniăn, pêi krúa kế kâ hdrối po leh tơbleăng, tung pơla po leh ƀă klêi leh tơbleăng. Pôa Trần Quang Hưng, Phŏ Pơkuâ bơrô rak Tơniăn krúa kế kâ, Khu xiâm ngăn pơkeăng - khăm pơlât kong pơlê Dak Lak, ăm ‘nâi:

“Khu xiâm ngăn pơkeăng – khăm pơlât kong pơlê Dak Lak hiăng mơjiâng 2 khu kăn lăm ngăn. Môi khu lăm séa ngăn a mâu tíu tê mơdró kâ ôu ki pế pơchên ăm tơmối kâ tung rôh leh tơbleăng; khu kăn ki u ối kô séa ngăn a mâu tíu hngêi ăm tơmối kâ koi ối pơtê, hngêi pế pơchên kế kâ - têa ôu, hnê pêi pế mâu kế kâ vâ ăm tơmói kâ xua Vi ƀan kuăn pơlê kong pơlê tơkŭm po, pơchên ăm mâu kăn i kâ ôu. Pakĭng mê, mâu kăn dêi Khu xiâm ngăn pơkeăng pơlât kong pơlê xuân séa ngăn mâu Khu ki Tơ’noăng pế pơchên kế kâ, mâu tơmeăm tơbleăng tê vâ tơniăn hlối pêi krúa lĕm kế kâ”.