Dế  rak ngăn kuăn pơlât a Hngêi pơkeăng kân kơpong Tây Nguyên, ngoh Y Vy Ktul, ối a  buôn Chăm, tơring Krông Ana ăm ‘nâi, tung 1 khế ngoh ai 2 ngế kuăn thế pơlât a hngêi pơkeăng  xua lo sêi. Ki tô tuăn thăm rế ó tâ xua 2 ngế o hdrêng ki ê a hngêi xuân hâi châ pâk vắc xin mơdât lo sêi.

"A ôh tá ‘nâi pro ti lâi, drêng lăm khăm  mê vâi tối tơngê lo tum hbri hbríu, lăm a kố nếo ‘nâi lo sêi. Hlo hdrêng  koi pơlât a hngêi pơkeăng tiah  kố  mê nếo ‘nâi troh văc xin lo sêi, mơni thế pâk ăm hdrêng hlối. Nôkố lăm a hngêi pơkeăng a hngêi ôh tá ai ngế pêi cheăng, ƀă hdrêng châi a xuân xâu há, tô tuăn ‘nâng’’.

Ƀok thái pơkeăng Trần Thị Thúy Minh, Ngế pơkuâ Khoa Nhi Tổng hợp, Hngêi pơkeăng  kơpong Tây Nguyên, ăm ‘nâi, nôkố pơreăng lo sêi dế tâ tú rĕng ƀă hên ngế hdrêng tâ tú ó. Tung kơxô̆ ki mê ai lối 60 ngế hdrêng dế pơlât a mâu  tíu ăm ối krê, hên hdrêng châi râ chiâng êi xôu, êi kloăng mâ ƀă chiâng châi klêa râ.

“Pơreăng lo sêi cho môi tung mâu  pơreăng ki rơ iô ƀă tâ tú rĕng, tâng vâ ngăn gá tâ tú rĕng tâ COCID-19. Mơhé ti mê, ai môi tơdroăng ki mơhúa vâ tối hên ngế ki hiăng pâk  văc xin mơdât lo xêi. Tâng ôh tá châ hbrâ mơdât văc xin kô râ ó ƀă kơxô̆ mơngế tâ tú kô  ó”.

Pôa Hoàng Hải Phúc, ngế pơkuâ Xiâm séa ngăn  pơreăng kong pơlê Dak Lak,  tối tơdroăng tâ tú pơreăng lo sêi tâk hên, kơvâ ngăn pơkeăng hiăng  tơbleăng hên troăng hơlâ vâ mơdêk séa ngăn pơreăng. Tung mê mơdêk séa ngăn pơreăng, pâk mơdât, pâk tơ’nôm văc xin ăm hdrêng ki hâi teăm pâk tŭm, mơgrúa lĕm hyôh kong prâi  a mâu tíu ai hên ngế tâ pơreăng ƀă hnê tối ăm kuăn pơlê hlê.

“Ngin hiăng veăng tăng ‘nâi plĕng ăm Khu xiâm ngăn pơkeăng pơlât vâ tơbleăng  pêi tơdroăng hbrâ mơdât lo sêi tung kong pơlê, tung mê ai pâk văc xin mơdât lo sêi, rubela ƀă hnê mơhno mâu tơring ‘na tơdroăng  cheăng pêi, klêi mê  mơdêk  rĕng tơdroăng pâk pơkeăng. Malối  ngin mơdêk tơdroăng hnê tối ăm mâu kơpong hngế hngo, kơpong hdroâng kuăn ngo, thế chiên dêi kuăn lăm pâk pơkeăng mơdât pơreăng”.

Tiô Khu xiâm hbrâ mơdât pơreăng (Khu xiâm ngăn pơkeăng), sap apoăng hơnăm troh nôkố lâp tơnêi têa tối ai lối 52.000 ngế lo sêi, hên má môi cho mâu kong pơlê peăng hdroh. Klêi ngế pro xiâm hnê ngăn tơnêi têa pơtroh kơthô a khế 11/2024 thế mơdêk hbrâ mơdât pơreăng lo xêi, hên kong pơlê chêh inâi rôe vaccine la iâ tê. Thăm nếo, tơdroăng tơkum pâk vâ tối bú to kơvâ ngăn pơkeăng thế ‘nôi, mâu kơvâ cheăng ki ê ôh tá veăng pâk hên, ôh tá tối tơbleăng mơhnhôk kuăn pơlê djâ dêi kuăn lăm pâk.  Tiô Tiê̆n sih ƀok thái pơkeăng Hoàng Minh Đức, Khu xiâm ngăn ‘na hbrâ Mơdât pơreăng, nôkố ai mâu kong pơlê ki ‘nâ hrá tơmâng tung tơdroăng hbrâ mơdât pơreăng:

“Tơdroăng mê tơdjâk troh tơdroăng tơkŭm pâk vắc xin, tơkéa vâ tối ki pơkâ, xoăng liăn ngân, rôe tơmeăm xúa tung pơlât tâi liăn... Nôkố mâu ki tâ tú tâk hên cho xúa mơngế pâk iâ tâ kơxô̆ mơngế tâ tú dêi pơreăng lo xêi”.

Hmâ hlo, klêi pâk 2 măng tĭng hdrêng kô ai trếo ki lěm  rơdêi kâi tơplâ mơdât pơreăng. Tung pơla pơreăng lo sêi tâ tú hên,  rơ iô môi tiah nôkố, nôu pâ kal thế djâ hdrêng ki ing 6 khế troh 10 hơnăm ki hâi pâk lơ hâi teăm pâk tŭm văc xin  lo sêi thế lăm pâk. Tâng nôu pâ ôh tá pâ nhên hiăng pâk ăm hdrêng tŭm lơ hâi teăm tŭm thế pâk tơ’nôm văc xin lo sêi kơ ôh tá pro ‘mêi ăm ivá hdrêng./.