Hâi lơ 13/8, lâp tung kong pơlê Lâm Đồng  tối hiăng ai vâ chê 4.000 ngế tro pơreăng lo sêi, tâk lối 3.800 ngế tâng vâ pơchông ƀă hơnăm nah. Mâu pơreăng thĕn kŏng chêng rơkong, tơngê lo mơheăm xuân tâk hên tung mâu măng tĭng achê kố, ƀă tâi tâng kơxô̆ mơngế tâ tú vâ chê 1.600 ngế ƀă ai lối 2.700 ngế, tung mê, ai 1 ngế hlâ xua tơngê lo mơheăm. Vi ƀan kuăn pơlê dêi kong pơlê Lâm Đồng hiăng pơkâ thế mâu khu xiâm ngăn pơkeăng pơlât ƀă mâu tíu pêi cheăng, kơvâ cheăng, cheăm bêng hbrâ, pêi kơtăng hnê mơhno, tơbleăng pêi tơƀrê mâu tơdroăng hbrâ mơdât pơreăng; tơniăn ‘na mơngế, pơkeăng, trếo pơkeăng, tơmeăm xua khăm pơlât ƀă tíu pêi cheăng pơlât ngăn mê.

Vi ƀan Kuăn pơlê dêi kong pơlê Lâm Đồng pơcháu ăm Khu xiâm ngăn pơkeăng pơlât pơkuâ, tơrŭm ƀă mâu tíu pêi cheăng ki ai tơdjâk troh ƀă mâu cheăm, bêng, kơpong ki hbrâ tơkŭm mâu khu lăm séa ngăn tăng ngăn, veăng kum tơdroăng cheăng plâ mơdât pơreăng a mâu tíu pêi cheăng, cheăm; teăm tối tơbleăng, pâ thế Vi ƀan kuăn pơlê dêi kong pơlê séa ngăn, hnê mơhno ƀă mâu tơdroăng kal luâ hnoăng pơkuâ.