Pơtối hlo ai vâi hdrêng tâ pơreăng lo sêi, Dak Lak mơdêk tơbleăng pâk vaccine
Thứ ba, 14:07, 16/07/2024
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV4.Xơ Đăng - Tung mâu hâi hdrối kố nah, kong pơlê Dak Lak pơtối ai 4 ngế hdrêng tâ tú pơreăng lo sêi, pro kơxô̆ vâi hdrêng ki lo sêi tung hơnăm kố tâk 5 ngế.
Vâ mơdât pơreăng lo sêi lơ tâ tú, kơvâ ngăn pơkeăng dế tăng ngăn tơbleăng ƀă pâk tơnôm vaccine hbrâ mơdât lo sêi ăm vâi hdrêng. 5 ngế hdrêng lo sêi a mâu tơring Čư̆ Kuiñ, Ƀuôn Đôn, Krông Ƀuk ƀă pơlê kong kơdrâm Ƀuôn Ma Thuột. Tung mê, ai 3 ngế hdrêng hâi pâk vaccine hbrâ mơdât lo sêi. Tiô pôa Hoàng Hải Phúc, Ngế pơkuâ Tíu xiâm séa ngăn mơdât pơreăng kong pơlê Dak Lak tối, xiâm ki tâ tú hên pơreăng lo sêi tung mâu hâi achê kố cho xua ôh tá tŭm vaccine pâk hbrâ mơdât pơreăng lo sêi tung hơnăm 2023 ƀă mâu khế apoăng hơnăm 2024.
Nôkố vaccine hiăng ai tŭm, kong pơlê dế tơkŭm tăng ngăn mâu vâi hdrêng ki hâi pâk vaccine a mâu tơring, cheăm, bêng vâ pơtối pâk tơ’nôm.
Viết bình luận