Kố cho rôh má 9 kong pơlê Gia Lai tơkŭm po tơdroăng pleăng mơheăm. Mâu rôh ki pleăng mơheăm hdrối mê, mâu ngế ki pleăng mơheăm đi đo châ hên hĭn mâu kuăn pơlê a Gia Lai môi tuăn, kơxô̆ ngế veăng pleăng mơheăm rế hía rế hên ƀă kơxô̆ mơheăm châ xo hơnăm kơ'nâi đi đo châ hên tâ hơnăm hdrối. Tiô Khu hnê mơhnhôk pleăng mơheăm kong pơlê Gia Lai, ing apoăng hơnăm troh nôkố, tung lâp kong pơlê hiăng tơkŭm po châ 54 rôh pleăng mơheăm, tơdah xo lối 10.400 tơdrong mơheăm.

Tung rôh po tơdroăng pleăng mơheăm rôh kố, Khu tơkŭm po pơkâ mơ’no mâu tơdroăng mơhnhôk ki hên cho 600 tơdrong mơheăm, pêi pro châ tơdroăng ki rơhêng vâ dêi hnoăng cheăng tŏng pơlât mâu ngế ki kal mơheăm. A rôh po tơdroăng kố, Khu hnê mơhnhôk pleăng mơheăm kong pơlê Gia Lai diâp hlá mơéa khê̆n kơdeăn ăm 17 khu pú hên, 3 ngế rơpŏng ƀă 25 ngế krê ki pleăng hên tung rôh mơhnhôk pleăng mơheăm hơnăm 2023 – 2024.