Dế ngăn dêi kuăn ki tơngê lo mơheăm a Khoa Hồi sức Cấp cứu Nhi ƀă Nhi Sơ sinh cho veăng pơlât tơdrêng ăm vâi hdrêng ki râ nếo kot mâ, Hngêi pơkeăng kân Kơpong Tây Nguyên, nâ Nguyễn Thị Nguyệt Ánh, ối acheăm Ea Tiêu, tơring Čư̆ Kuiñ, kong pơlê Dak Lakăm ‘nâi, xua ôh tá vâ rĕng tơmâng, tơngôu mê drêng kuăn nếo pơxiâm tơngê rơpŏng hngêi bú rôe pơkeăng ăm muăn ôu. Drêng hiăng râ nếo lăm pôu hngêi pơkeăng mê tơdroăng muăn tơngê chiâng rế râ ƀă môi tiah rế ó pá kâi hiâm, ăm hlo môi tiah ôh tá tơniăn tung mơheăm, thế pâk ‘mot mơheăm.

“Á tơngê hâi ki mê nah nôu á tơvâ tơdroăng cheăng bê 2 hâi, pơtroh ăm ối a hngêi mâu ngế ki hmâ, troh hâi má 3 nếo djâ álăm khăm drêng mê hiăng tơngê êi krôk ôu pơkeăng 1 hâi, troh hâi má 4 hlo tung châ hiăng ai tíu ki lo mê nếo djâ a hngêi pơkeăng tơring Čư̆ Kuiñ ƀă nếo pơtroh akố. A hngêi lo hêa tiah hmâ lăm a kố hlo tơdroăng tơngê rế râ mê xuân xâu’’.

A xoăng koi pakĭng mê, nâ Hoàng Thị Điệp, ối a cheăm Ea Bur, pơlê kong kơdrâm Ƀuôn Ma Thuột xuân dế pơlât ngăn dêi kuăn kơnốu 8 hơnăm tơngê lo mơheăm. Kuăn nâ Điệp mot pơlât xuân tung pơla mơheăm chu, mâu ƀok thái pơkeăng thế pâk ‘mot mơheăm mâu mơnê:

“Hâi pŭn măng tĭng hdrối mê o tơngê, klêi mê a djâolăm troh ohngêi pơkeăng pơlê kong kơdrâm khăm amê ƀok thái pơkeăng tối o tơngê êi krôk, pái hâi kơ’nâi mê xĕt ngiê̆m mơheăm ăm ‘nâi o tơngê lo mơheăm. Troh kơxê măng rế râ ƀok thái pơkeăng ăm o pơlât tơdrêng a hngêi pơkeăng kân kơpong. Drêng o mot pơlât a kố tơdroăng ki gá tơngê hiăng hơdroh iâ, la pâk ‘mot têa sơrôm hên ƀă o kố mơheăm gá chu kơdroh têi, cho dế râ ó’’.

A hngêi pơkeăng kân Kơpong Tây Nguyên nôkố ai 3 Kơvâ dế tơdah xo pơlât mâu ngế tơngê lo mơheăm mê cho Khoa Truyền nhiễm, Khoa Nhi tổng hợp ƀă Khoa hồi sức Cấp cứu Nhi ƀă Nhi Sơ sinh. Tiô kơxô̆ tơbleăng dêi mâu Khoa ing apoăng hơnăm troh nôkố, mâu Kơvâ  tơdah xo ƀă pơlât ăm dâng 500 ngế ki tơngê lo mơheăm, tơkŭm hên cho tung khế 7 ƀă apoăng khế 8. Tiô ƀok thái pơkeăng Hoàng Ngọc Anh Tuấn, Ngế pơkuâ Khoa Hồi Sức - Cấp cứu Nhi ƀă Nhi sơ sinh tối, mâu vâi hdrêng ki mot pơlât akố ai hên ngế hiăng râ, hlối kơdrâ, hêa lo mơheăm... chiâng rơ-iô troh ivá dêi hdrêng.

“Rêm ngế ki mot pơlât akố to mâu ki hiăng kơdrâ, râ, ƀă pơtối kơdrâ nếo. Púi vâ mâu nôu pâ lơ mơngế ki păn roăng rak ngăn kuăn ‘nĕngdrêng hlo vâi hdrêng tơngê ngăn vâi tơviah môi tiah hlo vâi tơngê hmân, châ kơdrâ rơxá ‘nâ hía ôh tá lŏn kâ kế thế rĕng djâ lăm pôu a hngêi pơkeăng ki achê vâ châkhăm ƀok thái pơkeăng vâ hnê tối ăm ‘nâi tơdroăng châi tamo, drêng vâi râ, kô teăm vâ pơlât’’.

Tiô tíu xiâm Séa ngăn mơdât pơreăng kong pơlê Dak Lak ing apoăng hơnăm troh nôkố, lâp tung kong pơlê hiăng tối ai 1.325 ngế tơngê lo mơheăm Dengue. Krê sap apoăng khế 8 troh nôkố ai lối 400 ngế. Pơlê kong kơdrâm Ƀuôn Ma Thuột cho pơlê kong kơdrâm ki ai hên ngế tơngê lo mơheăm hên má môi tung kongpơlê, ƀă lối 422 ngế.

Pôa Hoàng Hải Phúc, Ngế pơkuâ Tíu xiâm Séa ngăn pơreăng kong pơlê Dak Lak ăm ‘nâi, hlo pơreăng tâ tú tung kong pơlê Dak Lak tâk rĕng ƀă hlối rơ-iô, tíu pêi cheăng hiăng pơkâ thế Khu xiâm ngăn pơkeăng pơlât ăm tơ’nôm kơxô̆ liăn hbrâ, mơdât pơreăng tâ tútơdrêng, ki ôh tá bê  ƀă  tâi tâng kơxô̆ liăn dâng 500 rơtuh liăn.

“Hơnăm kố pơreăng kơdrâ tâk ƀă ngin hiăng kum ăm mâu tơring hên, la nôkố ‘na pơkeăng, trếo pơkeăng xuân môi tiah kơmăi kơmok mê ngin dếpơtroh hlá mơ-éa ăm Khu xiâm ngăn pơkeăng pơlât vâ pâ tơ’nôm pơkeăng. Khu xiâm ngăn pơkeăng pơlât hiăng tối tơbleăng ăm Khu xiâm ngăn liăn, ‘na Khu xiâm ngăn liăn kô pơtroh ăm Vi ƀan vâ kĭ môi tiah lâi mê mơni xuân thế tơkôm. Ngin xuân púi vâ rĕng ai kơxô̆ liăn vâ rôe pơkeăng, trếo pơkeăng, kơthung ki xôh, kơmăi kơmok xôk vâ gum pro tơniăn tung la ngiâ’’.

Tiô tối tơbleăng dêi kơvâ ngăn pơkeăng pơlât, sap nôkố ta troh mơ’nui hơnăm 2024, pơreăng tơngê lo mơheăm tơ’lêi pro rơ-iô tâ tú troh lâp lu a mâu tíu tung kơpong Tây Nguyên, tung mê ai kong pơlê Dak Lak. Tơdroăng mơdât pơreăng dế trâm hên xơpá xua tung kuăn pơlê xuân ối tơngôu, ôh tá vâ rĕng tơmâng, ‘na kơvâ ngăn pơkeăng a mâu cheăm tơring dế kal hên pơkeăng ƀă tơmeăm vâ xúa tung khăm pơlât.