Tiô Tíu xiâm mơdât pơreăng CDC kong pơlê Dak Lak Ngế châi vâi hdrêng o kơdrâi, kot mâ hơnăm 2016, ối a cheăm Ea Hồ, tơring Krông Năng. Tiô mâu ngế tung hngêi tối, hâi lơ 17/7, muăn tro tơngê râ, châi ko, châ djâ khăm pơlât a Tíu xiâm khăm pơlât tơring Krông Năng. Troh hâi lơ 20/7, vâi hdrêng châ pơtroh a Hngêi pơkeăng kân kơpong Tây Nguyên ƀă tối cho tơngê râ ton hâi, klêi kơ’nâi khăm ngăn muăn hiăng tro Êi ngôa Nhật Bản.

Tíu xiâm khăm pơlât tơring Krông Năng hiăng xôh pơkeăng mơgrúa kong prâi rơtâ tá hngêi ngế châi ƀă thăm pơtâng tối ăm kuăn pơlê tung kơpong, mâu troăng hbrâ mơdât pơreăng.