Tung mê pơkâ thế pâk tŭm trum pơkâ pâk vaccine ăm 95% ƀă mâu hdrêng ki dế tro hơnăm pâk, tung khế 3 măng tĭng kố, tiô hnê mơhno dêi Chin phuh ƀă Khu xiâm ngăn pơkeăng pơlât. Vâ chê 3 khế hdrối, kơvâ ngăn pơkeăng kong pơlê Kon Tum tối ai 728 ngế tâ pơreăng lo xêi ƀă nhôm lo xêi tâk 722  ngế tâng vâ pơchông bă hơnăm nah.

Pêi pro tiô hnê mơhno dei Chin phuh ƀă Khu xiâm ngăn pơkeăng pơlât, tơdrêng ƀă mơdêk tơdroăng hnê tối troh a mâu pơlê kơpong hơngế hơngo, kơpong kuăn ngo, kơvâ ngăn pơkeăng Kon Tum dế pâk vaccine hbrâ mơdât lo xêi. Ƀok thái pơkeăng chuyên khoa II Đỗ Ngọc Hòa, Phŏ ngế pơkuâ ngăn Pơkeăng pơlât kong pơlê Kon Tum, ăm ‘nâi, kơvâ ngăn pơkeăng kong pơlê dế mơdêk pak vaccine, mơ-eăm pâk châ 95% vâi hdrêng ki dế troh hơnăm pâk tung khế 3 kố.