Sap apoăng hơnăm troh nôkố, lâp tơnêi têa châ hlo vâ chê 40 rơpâu ngế nhôm tro tâ pơreăng lo xêi a 63 kong pơlê, pơlê kong kơdrâm, tung mê ai vâ chê 3.500 ngế yương tĭnh ƀă pơreăng lo xêi 61 kong pơlê, pơlê kong kơdrâm. Kơxô̆ ngế ki nhôm tro tâ pơreăng lo xêi châ hlo hên má môi a kơpong peăng hdroh (châ 57% kơxô̆ ngế tro tâ pơreăng dêi lâp tơnêi têa), peăng Hdroh tơnêi têa châ 19,2%, peăng Kơnhŏng tơnêi têa châ 15,1%, kơpong Tây Nguyên châ 8,7%. Tiê̆n sih Hoàng Minh Đức, Kơ koan xiâm hbrâ mơdât pơreăng tối ăm ‘nâi, hiăng ai 5 ngế hlâ xua tro tâ pơreăng lo xêi a kong pơlê Quảng Nam:

‘’Ngế ki hlâ achê kố cho a tơring Nam Trà My (Quảng Nam). Ngế tro tâ pơreăng cho ngế hdrêng tro pơreăng lo xêi laga ôh tá troh hngêi pơkeăng khăm, khăm pơlât, mê krếo ngế pơchâu troh hngêi vâ lăm tôih. Drêng pơreăng hiăng tâ troh hngêi pơkeăng mê hlâ’’.

Mâu kong pơlê, pơlê kong kơdrâm ai kơxô̆ mơngế tro tâ pơreăng hên cho Cao Bằng, Nghệ An, Quảng Nam, Đà Nẵng, Khánh Hòa, Dak Lak, Gia Lai, Kon Tum, Đồng Tháp, An Giang, Lâm Đồng. Mâu kong pơlê ai kơxô̆ mơngế tro tâ hên laga hiăng pơxiâm hiăng chôa ‘lâng ƀă châ mơdât mê cho: Lào Cai, Hà Giang, Hà Tĩnh, Bình Thuận, Bạc Liêu, Pơlê kong kân Hồ Chí Minh, Bình Dương, Đồng Nai, Tây Ninh ƀă Cà Mau.

Tiô Kơ koan xiâm hbrâ mơdât pơreăng, tung hơnăm 2024, kơxô̆ pâk vaccine mơdât lo xêi ăm vâi hdrêng tro hơnăm lối 97%. Laga, tung tơdroăng pâk pơkeăng vaccine a 31 kong pơlê, pơlê kong kơdrâm tơ’lêi tro tâ pơreăng hên nôkố u ối 7 kong pơlê, pơlê kong kơdrâm ai kơxô̆ ngế pâk vaccine tá hâi châ tiô pơkâ dêi Khu xiâm pơkuâ ngăn pơkeăng ƀă khăm pơlât. Pơkuâ roh hôp mơ’no tơdrêng tung um tiô troăng măng  tung lâp tơnêi têa, jâ Đào Hồng Lan, Ngế xiâm ngăn ‘na pơkeăng ƀă khăm pơlât pơkâ mâu tíu cheăng hbrâ mơdât pơreăng dêi Khu xiâm kal tơtrŏng tơdroăng pơreăng lo xêi a mâu kong pơlê ki iâ pâk pơkeăng vaccine, mâu kong pơlê kong ngo, tíu ai hên kơdrâm kuăn pơlê hdroâng kuăn ngo rêh ối, tơdroăng troh khăm pơlât ối iâ.

‘’Khu xiâm pơkuâ ngăn pơkeăng ƀă khăm pơlât dế tơbleăng Chin phuh tơbleăng mơ-éa ki kal hnê mơhno mơdêk rĕng tơdroăng pâk vaccine hbrâ mơdât pơreăng lo xêi a mâu kong pơlê. Khu xiâm xuân hiăng tơbleăng mâu pơkâ pâk vaccine mơdât lo xêi hơnăm 2025, ki rơhêng vâ tối cho drêng kố, kong prâi pơhlêh rơnó ƀă mâu pơhlêh ôh tá ‘nâi tối hdrối, pro tơ’lêi hlâu ăm mâu pơreăng ki tâ tú, ki rơhêng vâ tối cho pơreăng lo xêi’’.

Khu xiâm pơkuâ ngăn pơkeăng ƀă khăm pơlât xuân pơkâ mâu kong pơlê, pơlê kong kơdrâm đi đo mơnhên tơdroăng pơreăng lo xêi xông tâ tú, kơjo tŭm mơngế, tơmeăm ki kum parŏng, kơxô̆ liăn, tơmeăm khăm pơlât vâ pêi pro rĕng tơdroăng pâk vaccine mơdât pơreăng lo xêi, kêi đeăng tơdroăng pâk tơ’nôm, tăng pâk tâi tâng tung khế 3 kố.